Eńbektiń óteýi: Qarmet qyzmetkerleri memleket tarapynan joǵary marapatqa ıe boldy
QARAǴANDY. KAZINFORM – Respýblıka kúni qarsańynda Qaraǵandy oblysynyń kómir óndirý salasynda eńbek etip júrgen birqatar qyzmetker eńbegi elenip, joǵary memlekettik nagradalarǵa ıe boldy. Bul marapattar olardyń ónerkásipti damytýǵa qosqan úlesi men kópjyldyq adal qyzmetiniń joǵary baǵalanǵanyn aıǵaqtaıdy.
24 qazan kúni Memleket basshysy Qasym-Jomart Toqaev óndiris salasynda eńbek etip júrgen úzdik azamattarǵa memlekettik nagradalar tabys etti. Olardyń arasynda elimizdiń kómir ónerkásibin damytý men óndiristik áleýetin arttyrýǵa zor úles qosqan Qarmet kompanııasynyń qyzmetkerleri de bar.
Qarmet kompanııasyna qarasty «Shahtınskaıa» shahtasynyń baqylaý-ólsheý tehnıkasy basqarmasynyń ýchaske bastyǵy Sergeı Chernobaı «Qazaqstannyń Eńbek Eri» ataǵyna ıe boldy. Oǵan erekshe belgi – Altyn juldyz jáne «Otan» ordeni tabystaldy. Bul – el ıgiligi jolynda adal eńbek etip, Qazaqstannyń damýyna úles qosqan azamattarǵa beriletin eń joǵary marapat.
– Men Qarmet kompanııasynyń «Shahtınskaıa» shahtasynda eńbek etemin. Bizdiń kenshi áýletimizdiń jalpy eńbek ótili 150 jyldan asady. Búgin men úshin erekshe kún – Memleket basshysynyń qolynan joǵary memlekettik marapat aldym. Bul tek meniń jeke jetistigim emes, búkil áýletimizdiń eńbeginiń baǵalanýy dep bilemin. Shahtada menimen birge jubaıym men eki ulym da jumys isteıdi. Óz atymnan, otbasymnyń jáne kenshilerdiń atynan memleket tarapynan kórsetilip otyrǵan qoldaý men qurmetke alǵys aıtamyn, - dedi Sergeı Chernobaı.
Dál osy kúni Qaraǵandy qalasynda Respýblıka kúnine arnalǵan saltanatty kontsert ótti. Mádenıet saraıyndaǵy is-sharada oblys ákimi Ermaganbet Bólekpaev Memleket basshysynyń atynan Qarmet qyzmetkerlerine nagradalar tabys etti. Aımaq basshysy óz sózinde kenshiler men metallýrgter elimizdiń ındýstrııalyq tiregi ekenin bas aıtty.
«Qurmet» ordenimen Serik Temirov marapattaldy. Ol – «Saran» shahtasynyń №1 daıyndaý jumystary ýchaskesinde taý-ken kombaınynyń mashınısi bolyp eńbek etedi. Serik óndiristegi joǵary kásibıligi men jaýapkershiligi úshin jáne kómir óndirý salasyn damytýǵa qosqan eleýli úlesi úshin marapattaldy.
– Shahtada men 1989 jyldan beri jumys isteımin. Arnaıy ýchılışeni «jerasty elektroslesari» mamandyǵy boıynsha támamdadym. 2002 jylǵa deıin sol salada eńbek ettim, keıin kombaın mashınısi bolyp aýystym. Kombaında ken massasyn óńdep, aldyńǵy baǵytty ashý jumystaryna qatysamyn. Otbasymda kenshi mamandyǵyn tańdaǵan jalǵyz adammyn, bul men úshin úlken maqtanysh. Eńbegińniń baǵalanýy – úlken qýanysh. Mundaı qoldaý jumysshy mamandyǵynyń bedelin arttyra túsetini sózsiz, - deıdi Serik Temirov.
«Eren eńbegi úshin» medalimen Vıktor Hvostov marapattaldy. Ol – Qarmet kompanııasynyń Kómir departamentine qarasty «Saran» shahtasynyń tazalaý kenjaryndaǵy jumysshysy. Vıktor eńbektegi adaldyǵy, óndiristik mindetterdi múltiksiz oryndaýy jáne salanyń damýyna qosqan úlesi úshin baǵalandy.
Sondaı-aq dál osy medalǵa «Qazaqstan» shahtasynyń №1 óndiris ýchaskesinde kenshi bolyp eńbek etetin Erden Bashkenov te ıe boldy. Ol kóp jyldan beri shahtada jumys istep, tájirıbeli ári jaýapkershiligi joǵary maman retinde tanylǵan. Erden Bashkenov turaqty kómir óndirý kólemin qamtamasyz etýge aıryqsha úles qosyp keledi.
«Eńbek dańqy» III dárejeli ordenimen ıÝlııa Barabanova marapattaldy. Ol – «Vostochnaıa» baıytý fabrıkasynyń ortalyq basqarý pýltiniń operatory. ıÝlııa óz isiniń naǵyz mamany retinde dáldigimen, uqyptylyǵymen jáne turaqty jumys nátıjelerimen erekshelenedi. Onyń kásibı sheberligi óndiris protsesiniń úzdiksiz júrýin qamtamasyz etýge múmkindik beredi.
Respýblıka kúni qarsańynda tabystalǵan bul marapattar – tek jeke jetistikterdiń emes, tutas ken ónerkásibi ujymynyń eńbegine berilgen baǵa. Árbir marapattyń astarynda qajyrly eńbek, tabandylyq pen mamandyǵyna degen shynaıy adaldyq jatyr.
Qarmet kompanııasynyń kenshileri men ınjener-tehnık qyzmetkerleriniń eńbegi – elimizdiń ekonomıkalyq turaqtylyǵy men ónerkásiptik damýynyń negizi. Olardyń tájirıbesi men eńbekqorlyǵy jas urpaqqa úlgi bolyp, kenshi áýletteri arqyly adal eńbek dástúri jalǵasyp keledi.