Eńbekti qorǵaý mamandarynyń tapshylyǵynan óndiriste jaraqat alý kóbeıdi – sarapshy
ASTANA. QazAqparat - Eńbekti qorǵaý jónindegi mamandardyń tapshylyǵynan óndiriste jaraqat alý kórsetkishteri ulǵaıdy. Bul pikirdi QR «Atameken» UKP áleýmettik sala jáne áleýmettik seriktestik komıtetiniń tóraǵasy Talǵat Doskenov aıtty, dep habarlaıdy QazAqparat.
«Men eńbekti qorǵaý boıynsha mamandardy daıarlaýǵa jasalǵan sholýdy kórdim. Eńbekti qorǵaý jónindegi bakalavrıatqa mamandardyń 0,01 bóligi ǵana túsedi. Bizdiń oıymyzsha, Bilim jáne ǵylym mınıstrligi ekonomıkanyń naqty sektorlaryna maman daıarlaıtyn granttarǵa arnaıy tapsyrys berýi kerek», - dedi Talǵat Doskenov QR Eńbek jáne halyqty áleýmettik qorǵaý mınıstrliginde ótken dóńgelek ústelde.
Onyń aıtýynsha, jumysta jaraqat alyp, mert bolatyn adamdardyń basym bóligi 24-28 jáne 45-55 jas aralyǵyndaǵylar.
«Qaýipsiz eńbek» aqparattyq naýqanyn Jastar jyly aıasynda jasap otyrǵanymyz mańyzdy, sebebi 24-28 jáne 45-55 jas aralyǵyndaǵy jumysshylar kóbirek jaraqat alady. Bul máselege de basa mán bergen jón. Búginde bızneste bilikti kadrler jetispeýshiligi baıqalady, burynǵy mamandar qartaıyp keledi. Munyń barlyǵy bıznestiń qaýipsiz eńbek jaǵdaıyn jasamaýymen, jastardy qyzyqtyratyn laıyqty jumys oryndaryn qurmaýymen baılanysty», - dedi T. Doskenov.
Onyń aıtýynsha, 2018 jyly 672 myń qazaqstandyqqa zııandy ortada jumys istegeni úshin ótemaqy tólengen.
«Ótemaqy tóleý maqsatynda 107 mlrd teńge arnaıy bólindi. Bul - 2016 jylǵy kórsetkishten 8% kóbirek. Sondyqtan, memleket pen bıznes jańa óndiris oryndaryn «Vision Zero» (jaraqattarǵa jol bermeý) ustanymymen qurýy tıis», - dedi Talǵat Doskenov.
