Eńbekterińizdi baǵalaımyz – Kólginov kommýnaldyq qyzmettegi qyz-kelinshekterdi quttyqtady

NUR-SULTAN. QazAqparat - Elorda ákimi Altaı Kólginov kommýnaldyq qyzmet salasynda eńbek etip júrgen qyz-kelinshekterdi 8 naýryz – Halyqaralyq áıelder kúnimen quttyqtady. Bul týraly ol Instagram paraqshasynda jazdy, dep habarlaıdy QazAqparat.

«Kúndelikti keń aýqymdy oqıǵalar aǵynynda kommýnaldyq qyzmetkerlerdiń eńbegin baıqaı bermeımiz. Alaıda olardyń kúndelikti jumysy men biliktiliginiń arqasynda qalamyz taza, ári kúnnen kúnge qulpyryp keledi. Kommýnaldyq qyzmetkerler kún-tún demeı, kún raıy ystyq bolsa da, tipti boran soǵyp, tolassyz qar jaýyp tursa da, sarshunaq aıaz bolsa da toqtaýsyz jumys isteıdi.

Kommýnaldyq qyzmet qatarynda aıanbaı eńbek etip júrgen qyz-kelinshekterdi 8 naýryz merekesimen quttyqtadym. Olar qalamyzdyń tazalyǵyna úles qosyp keledi: qysta kósheniń qaryn kúrep, sanıtarlyq tazalyq jumysyn júrgizedi, kún jylynǵan shaqta gúlder men aǵashtar otyrǵyzyp, elordamyzdyń kórkin arttyra túsedi. Qalamyz turǵyndar úshin qolaıly ári yńǵaıly bolýy úshin baryn salýda.

Óz tarapymyzdan barynsha qoldaý kórsetip, eńbek jaǵdaıyn jaqsartamyz: kommýnaldyq qyzmet parkin júıeli túrde jańartyp, jalaqy mólsherin kóteremiz. Kommýnaldyq qyzmetkerlerimizdiń eńbegin joǵary baǵalaımyz. Osyndaı jaýapkershiligi mol, asa mańyzdy jumysta eńbek etip júrgenderińizge alǵysym sheksiz. Sizderge myqty densaýlyq, otbasylaryńyzǵa amandyq, baq-bereke tileımin!» - dep jazdy elorda ákimi.