Eńbekshilerdiń 76,6 paıyzy 2009-2011 jyldarǵa arnalǵan Bas kelisimnen habarsyz
Bul búgin Almatyda ótken «Álemdik qarjylyq daǵdarys jaǵdaıyndaǵy Úkimet, Kásipodaq federatsııasy jáne Ónerkásipshiler men kásipkerler odaǵynyń arasyndaǵy Úshjaqty kelisim. Jumys ornyn saqtap qalý memorandýmyn júzege asyrýdy baǵalaý» dep atalatyn respýblıkalyq konferentsııada aıtyldy, dep habarlaıdy QazAqparat.
«Qazaqstandaǵy eńbek qatynastary men eńbekshiler quqyn qorǵaý máseleleri boıynsha Astana, Almaty qalalary men Ońtústik jáne Shyǵys Qazaqstan oblystarynda qoǵamdyq pikirge áleýmettik zertteý júrgizgen edik. Qazannyń 9-yna deıin saýalnamalardyń 87 paıyzy taldandy. Aldyn ala qorytyndylarǵa qaraǵanda, saýalnamaǵa qatysqandardyń 60 paıyzyn - áıelder, 40 paıyzyn erler qurap otyr. Suralǵandardyń 26,6 paıyzy óz mamandyqtary boıynsha jumys jasamaıdy jáne 66,7 paıyzy qosymsha jumysqa muqtaj», deıdi «Áriptes» úkimettik emes uıymdardyń Almaty konfederatsııasynyń tóraıymy Láıla Ahmetova. Onyń aıtýynsha, eńbekshilerdiń 50 paıyzy óz jumysyna kóńili tolatynyn, 20 paıyzy kóńili tolmaıtynyn, 20 paıyzy aıtýǵa qınalatynyn jetkizgen. 46,7 paıyzy jumys ornyn aýystyrýdyń basty sebebi jalaqynyń azdyǵynan oryn alady dep sanaıdy.
