Eńbekshilder aýdanyna Birjan saldyń atyn berý jónindegi sheshim júzege assa ıgi - senator J. Erǵalıev
ASTANA. 7 naýryz. QazAqparat - Aqmola oblysynyń Eńbekshilder aýdanyna Birjan saldyń atyn berý jónindegi oblystyq máslıhat pen oblystyq ákimdiktiń sheshimi júzege assa ıgi.
Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Jabal Erǵalıev osy máseleni kóterdi.
«Qazaq poezııasy men óneriniń tarıhynda Birjan saldyń alatyn orny erekshe. Dańqty halyq kompozıtory, asqaq ánshi ári aqyn Birjan saldyń esimi men tamasha týyndylary bizdiń mádenıetimizdiń sarqylmas asyl qazynasynan berik oryn aldy. «Birjan - qazaqtyń halyqtyq mýzyka mádenıetiniń alyby. Birjannyń aty qazaq mýzykasynyń tarıhynda altynmen jazylady», - dep baǵalaǵan bolatyn áıgili óner zertteýshi akademık ǵalym Ahmet Jubanov. Mádenıetti qaýymdy Birjannyń ánshiligi, kompozıtorlyǵy, aqyndyǵy áli kúnge eriksiz súısintip keledi. Qazaqtyń ánshilik ónerin, mýzykasyn Birjan sal jańa beleske kótere bildi», - deıdi depýtat J. Erǵalıev. Bul rette senator halyq yqylasy men peıiliniń arqasynda, kópshiliktiń suraýy boıynsha Aqmola oblysynyń Eńbekshilder aýdandyq máslıhaty men aýdandyq ákimdiktiń 2003 jylǵy 20 maýsymdaǵy birlesken qaýlysymen Eńbekshilder aýdanyna, Birjan saldyń atyn berý jóninde uıǵarym jasalǵan bolatyn. Bul sheshimdi Aqmola oblystyq máslıhatynyń sessııasy maquldap, oblystyq máslıhat pen oblystyq 2003 jylǵy 22 qazandaǵy №3 S-1-19 sheshimi shyǵyp, bul qujat Qazaqstan Respýblıkasy Úkimeti janyndaǵy memlekettik onomastıka komıssııasyna jiberilgen.
«Birjan salǵa óz týǵan jeriniń aýmaǵynda ornalasqan aýdanǵa halyq kompozıtory men ánshisiniń atyn berý máselesin Úkimet sheshedi degen eldiń senimi áli de sýyǵan joq. Óńirge barǵan saparlarymyzda aýdan jurtshylyǵy osy máseleniń qashan sheshiletindigin suraýmen bolady. Osyǵan oraı, Aqmola oblysynyń Eńbekshilder aýdanyna Birjan saldyń atyn berý jónindegi oblystyq máslıhat pen oblystyq ákimdiktiń 2003 jylǵy sheshiminiń júzege asyrylýyna kóńil bólinse ıgi. Qazaq mádenıetiniń alyby Birjan saldyń esimi, el tarıhy umyt bolmasyn, oǵan qamqor kózben, ystyq sezimmen qaraıyq degen nıetten týǵan oı edi bul!», - dedi J. Erǵalıev.
