Eńbekshi mıgranttar men olardyń otbasynyń quqyqtyq mártebesi týraly kelisim maquldandy - Májilis
ASTANA. 18 mamyr. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Eńbekshi-mıgranttar men olardyń otbasy músheleriniń quqyqtyq mártebesi týraly kelisimdi ratıfıkatsııalaý týraly» zań jobasyn maquldady.
Qazaqstan, Reseı men Belarýs respýblıkalary arasynda jasalǵan atalmysh kelisim kóship-qonýshy eńbekshiler men olardyń otbasy músheleriniń quqyqtyq mártebesin aıqyndaıdy. Sondaı-aq, qujatta kóship-qonýshy eńbekshilerdiń eńbek qyzmetin júzege asyrý tártibi, olardy áleýmettik qorǵaý máseleleri qamtylyp otyr.
Kelisimge sáıkes, kóship-qonýshy eńbekshilerdi jumysqa tartýǵa baılanysty qyzmetti jumysqa ornalasatyn memlekettiń jumys berýshileri ulttyq eńbek naryǵyn qorǵaý jónindegi shekteýlerdi eskermeı júzege asyratyn bolady. Kóship-qonýshy eńbekshiniń jumys berýshimen eńbek qatynastary jumysqa ornalasatyn memlekettiń zańnamasymen rásimdeledi.
Kelisimge sáıkes, ulttyq qaýipsizdikti, onyń ishinde strategııalyq mańyzy bar ekonomıka salalarynda, qoǵamdyq tártipti, basqa da adamdardyń ımandylyǵyn, densaýlyǵyn, quqyqtary men zańdy múddelerin qamtamasyz etý maqsatynda kóship-qonýshy eńbekshilerdiń eńbek qyzmetine, olardyń kásibiniń túrine jáne bolatyn aýmaǵyna qatysty Taraptar memleketiniń zańnamasynda belgilengen shekteýlerdi kóship-qonýshi eńbekshiler men olardyń otbasy músheleriniń quqyqtary men bostandyqtaryn shekteý retinde qaraýǵa bolmaıdy.
Kelisimdi iske asyrý maqsatynda taraptar birqatar baǵytta yntymaqtastyqty damytady. Atap aıtqanda, syrtqy eńbek kóshi-qonyn retteý salasyndaǵy saıasatty kelisedi, kóship-qonýshy eńbekshilerdiń eńbegin zańsyz paıdalanýdy bolǵyzbaý sharalaryn qamtıdy.
Májilis maquldaǵan zań jobasy Parlament Senatyna jiberiledi.
