Eńbekmıni Qazaqmys jumyskerlerin eńbek daýyn quqyqtyq alańda retteýge shaqyrady
ASTANA. KAZINFORM — Osy jyldyń 17-18 jeltoqsanynda «Jezqazǵantústimet» ÓB birneshe shahtasynyń jumyskerleri jalaqyny kóterý talabymen jumysty toqtatty.
QR Eńbek jáne halyqty áleýmettik qorǵaý mınıstrligi (budan ári — Eńbekmıni) «Qazaqmys korporatsııasy» JShS «Jezqazǵantústimet» óndiristik birlestiginiń ereýilge shyqqan jumyskerleri eńbek zańnamasynyń normalaryn buzǵanyn málimdeıdi jáne kompanııa jumyskerlerin óz jumystaryn qaıta bastaýǵa shaqyrady jáne olardyń jumys berýshige qoıylatyn talaptaryn belgilengen tártippen talqylaýdy usynady.
Osy jyldyń 17-18 jeltoqsanynda «Jezqazǵantústimet» ÓB birneshe shahtasynyń jumyskerleri jalaqyny kóterý talabymen jumysty toqtatty. Jumyskerlerdiń bul áreketteri eńbek zańnamasynda kózdelgendeı talaptardy usyný tártibin jáne olardy jumys berýshiniń qaraý retin buza otyryp júrgizildi.
— QR Eńbek kodeksine sáıkes qoldanystaǵy tártip: osy talaptardy jumys berýshige resmı joldaýdy, olardy jumys berýshimen qaralýyn, al ony sheshý múmkin bolmaǵan jaǵdaıda tatýlastyrý komıssııasynda qarastyrýdy kózdeıdi. Jumyskerlerdiń talaptaryn qaraýdyń atalǵan tártibi óndiristik protsesti toqtata turýdy kózdemeıdi. Zańnamada belgilengen tártipti saqtamaý tártiptik jaýaptylyqqa ákep soǵady. Qalyptasqan jaǵdaıdy retteý maqsatynda Eńbekmıni taraptardy tatýlastyrý komıssııasy sheńberinde jáne tek quqyq aıasynda tatýlastyrý rásimderin júrgizýge jáne jumysqa qaıta kirisýge shaqyrady, — delingen mınıstrlik habarlamasynda.
Buǵan deıin «Qazaqmys korporatsııasy» 2025 jyldyń basynda jumyskerlerdiń jalaqysyn kóteretini týraly jazdyq.