Enbek.kz portalynda jasandy ıntellekt 50 myńnan astam bos jumys ornyn usyndy

ASTANA. KAZINFORM — Memleket basshysynyń tapsyrmasyn iske asyrý aıasynda aǵymdaǵy jyldyń sáýir aıynda QR Eńbek jáne halyqty áleýmettik qorǵaý mınıstrligi «Enbek.kz» elektrondy eńbek bırjasynda jasandy ıntellekt kómegimen jumys izdeýshiler úshin bos jumys oryndaryn avtomatty túrde anyqtaý fýnktsıonaldyǵyn júzege asyrdy.

1 qyrkúıektegi jaǵdaı boıynsha 50 myńnan astam usynys jasaldy, dep habarlaıdy QR Eńbek jáne halyqty áleýmettik qorǵaý mınıstrligi.

— Qoldanylatyn JI modeli túıindemeler men bos jumys oryndaryn taldaı otyryp, talap etiletin mamandyqty nemese mamandyqtar tobyn, kútiletin jalaqy mólsherin, turǵylyqty óńirdi jáne kásibı daǵdylardy eskere otyryp usynystar beredi. Bul rette tabıǵı tildi óńdeý jáne mashınalyq oqytý boıynsha zamanaýı tehnologııalar paıdalanylady, — delingen habarlamada.

Atalǵan joba túıindemeler men vakansııalardy taldaý protsesin avtomattandyrýǵa baǵyttalǵan, bul jumys berýshiler úshin laıyqty kandıdattardy izdeý ýaqytyn edáýir qysqartýǵa jáne qol eńbegin azaıtýǵa múmkindik berdi.

Túıindemeni óńdeý ýaqyty 2 sekýndtan aspaıdy, al qolmen vakansııa irikteý protsesi 80%-ǵa qysqardy. Aldaǵy ýaqytta JI-di qoldaný arqyly jumys izdeý protsesin 90%-ǵa deıin jedeldetý kútiledi.

Eske sala keteıik, Qazaqstanda jasandy ıntellekt jáne tsıfrlyq damý mınıstrligi qurylady.