Enbek.kz-ke qarashada ornalastyrylǵan bos jumys oryndarynyń 73%-y bilikti mamandarǵa arnaldy
ASTANA. KAZINFORM – 2025 jyldyń qarasha aıynda Enbek.kz elektrondyq eńbek bırjasy (budan ári – Enbek.kz) alańynda 101,1 myń vakansııa jarııalandy, olardyń 73%-y biliktilikti talap etetin laýazymdar boldy. Bul týraly Eńbek jáne halyqty áleýmettik qorǵaý mınıstrligi habarlady.
Aldyńǵy aımen salystyrǵanda jalpy vakansııalar sany 23%-ǵa, onyń ishinde bilikti mamandarǵa arnalǵan vakansııalar 26%-ǵa azaıdy. Óz kezeginde úmitkerler 101,3 myń túıindeme ornalastyrdy, bul qazan aıymen salystyrǵanda 11%-ǵa tómen.
Qarashada vakansııalar jalpy azaıǵanyna qaramastan, birqatar salada oń dınamıka baıqaldy. Mysaly, vakansııalar sany: taý-ken óndirý ónerkásibinde 26%-ǵa (+344 birlik) ósip, 1,7 myńǵa jetti; ákimshilik qyzmet kórsetý salasynda – 19%-ǵa (+368 birlik) ósip, 2,3 myńǵa; aýyl sharýashylyǵynda – 11%-ǵa (+828 birlik) ósip, 8,3 myńǵa; turý jáne tamaqtandyrý qyzmetteri salasynda – 2%-ǵa ósip, 1,8 myń vakansııaǵa jetti.
Vakansııalardyń eń kóp qysqarýy oıyn-saýyq jáne demalys qyzmetteri salasynda baıqaldy – 55%-ǵa (-3 myń birlik) azaıyp, 2,4 myńǵa; memlekettik basqarýda – 40%-ǵa (-3,4 myń birlik) azaıyp, 5,2 myńǵa; energetıkada – 38%-ǵa (-1,5 myń birlik) tómendep, 2,4 myń vakansııaǵa deıin qysqardy. Ózge salalarda tómendeý úrdisi birshama báseń boldy.
Vakansııalar sanynyń azaıýy maýsymdyq faktorlarmen baılanysty – eń aldymen, jylytý maýsymynyń bastalýyna oraı túrli salalardaǵy kásiporyndardyń qazandyq qondyrǵylary úshin kadrlardy jasaqtaý protsesi aıaqtalǵannan keıin mundaı jumys kúshine degen suranystyń tómendeýimen túsindiriledi.
Óńirlik turǵydan alǵanda, qarasha aıynda Jetisý oblysynan basqa (+11%, 2,7 myńǵa deıin) barlyq óńirlerde vakansııalardyń azaıýy baıqaldy. Eń kóp qysqarý Batys Qazaqstan (-4,7 myń, 3,7 myńǵa deıin), Jambyl (-3,8 myń, 5 myńǵa deıin) jáne Atyraý (-2,5 myń, 4 myńǵa deıin) oblystarynda, tıisinshe 124%, 75% jáne 61%-ǵa deıin tirkeldi.
Vakansııalardy ornalastyrý sany boıynsha kósh bastap turǵan óńirler – Túrkistan oblysy (11,1 myń), sondaı-aq Astana (9,3 myń) jáne Almaty (7,2 myń) qalalary. Bul úsh óńir qarasha aıynda jarııalanǵan barlyq vakansııalardyń shıreginen astamyn qurady.
Eń suranysqa ıe mamandyqtar: meıirbıke/meıirger – 1,9 myń, sanıtar – 1,8 myń, tárbıeshi jáne avtomobıl júrgizýshisi – árqaısysy 1,5 myń bos jumys oryndary.
Qarasha aıynda eń joǵary jalaqy deńgeıleri bas qurylysshylarǵa (640 myń teńgeden bastap), óndiristik ýchaske bastyqtaryna (595 myń teńgeden bastap) jáne avıatsııalyq dıspetcherlerge (568 myń teńgeden joǵary) usynyldy. Al eń joǵary jalaqy kútý deńgeıi pılottarda (ortasha 1,9 mln teńge), kommertsııalyq uıymdardaǵy IT-bólim basshylarynda jáne bas geologtarda (shamamen 1,2 mln teńge) baıqaldy.
Osylaısha, 2025 jyldyń qarashasynda Enbek.kz alańynda jumys berýshiler men úmitkerler belsendiliginiń tómendeý úrdisi jalǵasty. Bul, eń aldymen, maýsymdyq túzetýlerge baılanysty bolyp otyr. Sonymen birge salalyq jáne biliktilik turǵysynan suranys pen usynys qurylymy aıtarlyqtaı ózgergen joq.
Buǵan deıin