Eńbekqorlyq halqymyzdyń bolmysyna sińgen qasıet bolýǵa tıis – Memleket basshysy

TÚRKІSTAN. KAZINFORM – Memleket basshysy eńbekqorlyq halqymyzdyń bolmysyna sińgen qasıet bolýǵa tıis ekenin aıtty. 

— Balabaqshada, mektepte, ýnıversıtette, ǵylym ınstıtýtynda, medıtsınada, óndiris mekemesinde, saýda jáne qyzmet kórsetý oryndarynda, tipti, memlekettik qyzmet pen áskerı salanyń ózin aıtpaǵanda, barlyq saladaǵy basty qundylyq — adal eńbek, adal qyzmet bolýǵa tıis.

Osy maqsatpen ótken jyldy búkil el bolyp jumysshy mamandyqtaryn dáripteýge, olarǵa qurmet kórsetýge arnadyq. Bul kezekti naýqan emes, memlekettik ıdeologııanyń bir bóligi, sondyqtan osy jumyspen únemi aınalysýymyz kerek, — dedi Qasym-Jomart Toqaev.

Memleket basshysy progress elimizge arnaıy shaqyrý boıynsha qurmetti qonaq bolyp kelmeıtinin aıtty.

— Jumystyń jamany bolmaıdy. Adal jumystan uıalýdyń eshqandaı qajeti joq. Eńbektiń bári qadirli. Bul danalyqty jastardyń bári jaqsy túsinýi kerek.

Eńbekqorlyq halqymyzdyń bolmysyna sińgen qasıet bolýǵa tıis. Onsyz eshqandaı damý da, órkendeý de bolmaıtyny aıdan anyq.

Іlgerileý, ıaǵnı, progress elimizge arnaıy shaqyrý boıynsha qurmetti qonaq bolyp kelmeıdi, qundy syılyq retinde berilmeıdi. Іlgerileýge qol jetkizý úshin búkil qoǵam bir ujym bolyp tabandy, úılesimdi jumys isteýi kerek.

Sonymen qatar ilgerileý, órleý degenimiz — joǵary tehnologııalar nemese ǵylym salasyndaǵy jetistikter ǵana emes, bul — árbir saladaǵy jappaı qajyrly eńbektiń nátıjesi, — dedi ol.

Aıta ketelik Memleket basshysy Túrkistan oblysyna jumys saparymen bardy.