Eńbekke jaramsyzdar men asyraýshysynan aıyrylǵandarǵa beriletin járdemaqy ósedi

ASTANA. KAZINFORM — Eńbek jáne halyqty áleýmettik qorǵaý mınıstrligi memlekettik áleýmettik saqtandyrý qorynan tólenetin áleýmettik tólemderdiń mólsherin arttyrýǵa arnalǵan qaýly jobasyn kópshilik talqylaýyna shyǵardy. 

— 2026 jyldyń 1 qańtaryna deıin taǵaıyndalǵan eńbekke qabiletin joǵaltqan jáne asyraýshysynan aıyrylǵandarǵa Memlekettik áleýmettik saqtandyrý qorynan tólenetin áleýmettik tólemderdiń mólsheri qoldanystaǵy tólemniń 10 paıyzyna ulǵaıtylady, — dep jazylǵan qujatta.

Qazir bala kezinen múgedektigi bar adamdarǵa tólenetin tólem mólsheri tómendegideı:

• birinshi toptaǵy — 2,20 eń tómen kúnkóris deńgeıi (101 702 teńge);

• ekinshi toptaǵy — 1,83 eń tómen kúnkóris deńgeıi (84 598 teńge);

• úshinshi toptaǵy — 1,61 eń tómen kúnkóris deńgeıi (74 428 teńge);

Al asyraýshysynan aıyrylý jaǵdaıy boıynsha beriletin járdemaqy mólsheri otbasynyń eńbekke jaramsyz bir múshesi bolǵan kezde — 0,92 eń tómen kúnkóris deńgeıi (42 530 teńge)

• ata-anasynyń ekeýinen de aıyrylǵan jaǵdaıda — jetim balalarǵa asyraýshysynan aıyrylý jaǵdaıy boıynsha aı saıynǵy járdemaqy — 1,54 eń tómen kúnkóris deńgeıi (71 192 teńge) mólsherinde taǵaıyndalady.

Buǵan deıin 2026 jyly zeınetaqy da 10 paıyz ósetinin jazǵan edik.