Eńbekke jaramsyz ata-anaǵa balalarynyń qamqorlyq jasaýy Konstıtýtsııada bekitildi – Ardagerler uıymy
ASTANA. KAZINFORM – Májilis depýtaty, «Ardagerler uıymy» respýblıkalyq qoǵamdyq birlestiginiń tóraǵasy Baqtyǵoja Іzmuhambetov jańa Konstıtýtsııaǵa egde adamdarǵa qatysty qandaı mańyzdy normalar engenin aıtyp berdi.
– Jańa Konstıtýttsııa jobasynda árbir azamatqa jalaqy men zeınetaqynyń eń tómen mólsherine, jasyna, naýqastanýyna nemese múgedektigine baılanysty áleýmettik qamsyzdandyrýǵa tikeleı kepildik berilgen. Sonymen birge, memleket áleýmettik qamsyzdandyrýdyń jáne qaırymdylyqtyń túrli nysandaryn damytýǵa járdemdesý mindetin alyp otyr. Bul egde jastaǵy adamdar úshin qosymsha qaýipsizdik beredi, – dedi B.Іzmuhambetov Konstıtýtsııalyq komıssııa otyrysynda.
Konstýtsııanyń jańa jobasynda Preambýlaǵa tarıhı-mádenı murany saqtaý men ulttyq mádenıetti qoldaý − memlekettik qyzmettiń negizgi qaǵıdalarynyń biri degen tujyrym engizildi. Osylaısha el bolashaǵyn qalyptastyrýda eń aldymen jınaqtalǵan bilim, tájirıbe jáne tárbıeni urpaqqa jetkizý arqyly aǵa býynnyń aıryqsha róli moıyndalyp otyr.
– Burynǵy konsýltatıvtik qurylymdardyń ornyna «Qazaqstannyń Halyq Keńesi» qurylyp, quramyna barlyq óńirdiń ókilderi enedi. Bul da aǵa býynǵa mańyzdy memlekettik sheshimder men zańdardy talqylaýǵa qatysý múmkindigin beredi. Jańa Konstıtýtsııa sabaqtastyq qaǵıdatyn saqtap, reformalar buryn júrip ótken joldy joqqa shyǵarmaı, jınaqtalǵan tájirıbege súıengen, – deıdi depýtat.
Aǵa býyn úshin mańyzdy tarmaq − kámeletke tolǵan eńbekke qabiletti balalardyń eńbekke jaramsyz ata-analaryna qamqorlyq jasaý mindetin Konstıtýtsııada bekitý urpaqtar sabaqtastyǵy men otbasylyq yntymaqtastyqty kúsheıtedi.
Jańa Konstıtýtsııa jobasy azamattardyń jeke qarajaty men ómirin qorǵaýdy da kúsheıtedi. Memleket bank salymdardyń, jınaqtardyń saqtalýyna jáne qarjylyq operatsııalardyń qupııa bolýyna kepildik beredi.
– Onda jeke derekterdi alaıaqtardan jáne zańsyz paıdalanýdan, onyń ishinde ınternet-keńistikte qorǵaý jeke norma bolyp bekitiledi. Bul tsıfrlyq tehnologııalardy paıdalana almaıtyn jáne memlekettik qyzmetterdi, medıtsınalyq kómekti alý nemese qarjylyq operatsııa júrgizýde syn-qaterge jıi tap bolatyn egde adamdar úshin erekshe mańyzdy, – dep tolyqtyrdy Ardagerler uıymynyń tóraǵasy.
Sondaı-aq el ardagerleri 3-bapta joǵary ekologııalyq mádenıetti qalyptastyrý jáne tabıǵatqa uqypty qaraý qaǵıdatynyń alǵash ret konstıtýtsııalyq deńgeıde bekitilgenine de rıza.
Sóz sońynda Baqtyǵoja Іzmuhambetov ardagerler qaýymy osy ázirlengen Konstıtýtsııa jobasyn qoldaıtynyn jetkizdi.
Buǵan deıin Konstıtýtsııalyq sot tóraǵasynyń orynbasary Baqyt Nurmuhanov Konstıtýtsııa jobasynyń 9-babynda «teń» sózi «qatar» dep ózgertilgenin aıtqan edi.