Eńbekke jaramdy azamattardyń 28 paıyzy orta bilimmen shektelgen - Birjan Nurymbetov
ASTANA. QazAqparat - Qazaqstanda 9 mıllıonǵa jýyq eńbekke jaramdy azamattardyń 28 paıyzy, ıaǵnı shırek bóligi orta bilimmen ǵana shektelgen.
Bul týraly búgin Ortalyq kommýnıkatsııalar qyzmetinde «Elektrondy eńbek bırjasyn qurý men jumyssyz jáne ózin jumyspen qamtyǵandardy esepke alýdyń jańa quraldaryna arnalǵan brıfıng barysynda QR Eńbek jáne halyqty áleýmettik qorǵaý vıtse-mınıstri Birjan Nurymbetov habarlady.
«Resmı statıstıkaǵa júginsek, elimizde 9 mıllıonǵa jýyq eńbekke jaramdy azamattardyń 28 paıyzy orta bilimmen ǵana shektelgen. Jumyssyz azamattardyń 25 paıyzynda jáne ózin jumyspen qamtyǵandardyń teń jartysynda kásibı bilim joq. Halyqtyń tolyqqandy jumyspen qamtylmaýynyń bir sebebi osy bolǵandyqtan, Úkimet halyqty jappaı oqytý jáne olardy kásipkerlikke tartyp, kásipkerlik bastamalaryn qoldaý boıynsha eki negizgi baǵytty qolǵa alyp otyr», - dep málimdedi Birjan Nurymbetov.
Vıtse-mınıstrdiń aıtýynsha, bıylǵy qyrkúıek aıynda UBT-da qajetti ball jınaı almaǵan jáne oqýǵa túse almaı qalǵan mektep túlekteri jumyspen qamtý baǵdarlamalary arqyly tehnıkalyq-kásiptik bilim alýǵa jiberiledi. Olar tegin oqýmen, shákirtaqymen,bir mezgil ystyq tamaqpen jáne jolaqymen qamtamasyz etiledi. Qajet bolǵan jaǵdaıda, turǵyn úı jaldaýǵa da materıaldyq kómek kórsetý qarastyrylǵan. Atalǵan baǵytta bıyl 21 myńǵa jýyq balany tehnıkalyq-kásiptik oqýǵa jiberý josparlanǵan.
«Ekinshi baǵyt jumyssyz júrgen eresekterdi, arnaýly bilimi joq azamattardy qysqa merzimdi kýrstarda oqytý, - dedi vıtse-mınıstr B.Nurymbetov. Olarǵa kásibı bilim berip qana qoımaı, kásibı daǵdylanýyn qamtý kerek. Adamnyń belgili bir kásibı daǵdylardy ıgerýi jumys tabýǵa nemese shaǵyn kásipkerlikpen aınalysyp ketýge septigin tıgizedi. Josparymyzǵa sáıkes, bıyl 70 myńǵa jýyq adamdy qysqa merzimdi kýrstarda oqytamyz».
Sonymen birge, vıtse-mınıstr Ulttyq kásipkerler palatasy júrgizip otyrǵan «Bıznes-Bastaý» jobasy arqyly15 myńǵa jýyq adamdy kásipkerlik negizderi boıynsha oqytýdy qolǵa alǵandaryn jáne bıyl jappaı oqytý baǵyty boıynsha 100 myńnan astam adamnyń bilim alatynyn málim etti.
Eske sala ketsek, QR eńbek jáne halyqty qorǵaý vıtse-mınıstri aǵymdaǵy jyly elektrondy eńbek bırjasynyń iske qosylatynyn habarlady. Atalǵan bırja qazirgi enbek.kz portaly negizinde jumys isteıdi. Onda jumys izdep júrgen azamattar men bos oryndar týraly tolyq aqparat jarııalanady. Sonymen birge, jumys izdeýshiler úshin jeke elektrondy kabınetter ashylyp, onlaın rejimde suxbattasýdy uıymdastyrý qyzmetteri de qoljetimdi bolady.
