Eńbekke qurmet: «Tirek» derekti fılmi kórermenge usynylady
ASTANA. KAZINFORM — Búgin Prezıdent Teleradıokesheniniń Derekti kıno ortalyǵy túsirgen «Tirek» derekti fılmi kórermenge jol tartady. Týyndy jumysshy mamandyq ıeleriniń kúndelikti tynys-tirshiligin baıandaıdy.
Fılm keıipkerleriniń biri — «Jomart» sharýa qojalyǵynda uzaq jyldar boıy eńbek etip kele jatqan Nurbol Amanjolov. Ol bıyl mal sharýashylyǵynyń damýyna qosqan úlesiniń arqasynda Memleket basshysynyń Jarlyǵymen «Eren eńbegi úshin» medalimen marapattaldy.
— Bala kezimizde ákem «mal baqqanǵa bitedi» deıtin. Onyń maǵynasyn keıin túsindik. Qazir otbasymyzben osy ustanymmen eńbek etemiz. Balalardy da jastaıynan jumysqa baýlımyz. Sebebi adamdy alǵa súıreıtin — eńbek, — deıdi ol.
Fılmde saýynshy Gúlnár Ábdiramanovanyń eńbek joly da qamtylǵan. Onyń aýyl sharýashylyǵy salasyndaǵy eńbek ótili — 20 jyl. Sońǵy on jylda sút fermasynda saýynshy bolyp jumys isteıdi. Kún saıyn túngi úshte turyp, eki áriptesimen birge 400-ge jýyq sıyr saýady.
— Buryn qolmen saýdyq. Bel aýyratyn, qol kúbirtke bolatyn. Soǵan qaramastan jumysty tastaǵan joqpyz, — deıdi ol.
Osy jyly Gúlnár Ábdiramanovanyń eńbegi joǵary baǵalanyp, Memleket basshysynyń qolynan «Eren eńbegi úshin» medalin aldy.
— Astanaǵa ushaqpen alǵash ret bardym. Qatty tolqydym. Prezıdenttiń qolynan marapat alý men úshin zor qýanysh boldy, — deıdi saýynshy.
«Tirek» derekti fılmi tek osy keıipkerlermen shektelmeıdi. Týyndyda kúndelikti tirligin tııanaqty atqaryp júrgen taǵy ondaǵan jannyń ómir joly bar. Olardyń tabandylyǵy, adaldyǵy men kásibine degen súıispenshiligi jas býynǵa úlgi bolary sózsiz.
Aıta keteıik, Memleket basshysy 2025 jyldy Jumysshy mamandyqtary jyly dep jarııalaǵan bolatyn. Al «Tirek» fılmi — olarǵa degen shynaıy qurmetti, el tiregin tanytatyn taǵylymdy týyndynyń biri.
Derekti fılmdi búgin saǵat 17:15–te Jibek Joly arnasynan tamashalaýǵa bolady.