Eńbekke qabiletti qazaqstandyqtardyń 23 paıyzy bıznespen aınalysady

ASTANA. QazAqparat - Ótken jyly IV toqsanda Qazaqstan ekonomıkasynyń ártúrli salalarynda 9 mln adam jumyspen qamtyldy. Onyń 6,9 mln-y (jumyspen qamtylǵandardyń jalpy sanynan 76,7%) - jaldamaly qyzmetker bolsa, 2,1 mln adam (23,3%) - ózin-ózi jumyspen qamtýshylar, dep habarlaıdy QazAqparat.

Ulttyq statbıýro málimetinshe, IV toqsanda aptasyna naqty jumys istegen saǵat sany orta eseppen jumyspen qamtylǵandardyń bireýinde - 39 saǵat, jaldamaly qyzmetkerler arasynda - 41 saǵat, ózin-ózi jumyspen qamtýshylar arasynda 34 saǵatty qurady.

Tolyq jumyspen qamtylmaǵandar sany aldyńǵy toqsanmen salystyrǵanda 9,9% ósip, 268,9 myń adam boldy.

IV toqsanda jumyssyzdyq deńgeıi (HEU ádistemesi boıynsha) 0,1 p.t tómendep, 4,8% qurady.

Jumyssyzdar sany - 456,1 myń adam.

Jumyssyz júrse de, ony izdemegen nemese jumysqa kirisýge daıyn bolmaǵan adam sany (potentsıaldy jumys kúshi) III toqsanmen salystyrǵanda 19,3% azaıyp, 39,5 myń boldy.

15-28 jastaǵy jastar arasyndaǵy jumyssyzdyq deńgeıi III toqsanmen salystyrǵanda 0,1 p.t tómendep, 3,8% qurady.

NEET jastarynyń jumyssyzdyǵy, ıaǵnı bilim alýmen nemese kásibı daıarlyqpen aınalyspaıtyn jastardyń úlesi 0,4 p.t tómendegen - 6,3%.

Eńbek jáne halyqty áleýmettik qorǵaý mınıstrliginiń jumyspen qamtý organdarynda 2023 jylǵy qańtar aıynyń sońyna 212,1 myń jumyssyz resmı tirkelgen. Olar - jumys kúshiniń 2,3 paıyzy.