Eńbekke qabiletti halyqtyń 80% jeke sektorda jumys isteıdi – Tımýr Qulybaev
Onyń aıtýynsha, sońǵy 4 jylda azyq-túlik baǵasy 37%, ózge taýarlar 42%-ǵa qymbattady. Al halyqtyń naqty aqshalaı tabysy nebary 11%-ǵa ósti. Halyq bastapqy qajettilikterge qarajat jetispeýshiligin tutynýshylyq nesıe arqyly sheshýge májbúr. Nátıjesinde azamattarǵa berilgen nesıe kólemi 22%-ǵa nemese 6,2 trln teńgege deıin ósti, al nesıeniń jartysynan kóbi kepilsiz berilgen. Sondyqtan mundaı nesıeleýde úlken syn-qater bar.
«Memleket basshysynyń tapsyrmasymen Úkimet muǵalimder men medıtsına qyzmetkerleriniń jalaqysyn kóterý týraly sheshim qabyldaǵanyn bilesizder. 1,6 mıllıonnan asatyn bıýdjettik qyzmetkerlerdiń mártebesin kóterý úshin jalaqylaryn kúrt arttyrý qajet. Bıýdjettik qyzmetkerlerdiń jalaqy qory 2,2 trln teńgege baǵalanyp otyrǵanyn eskersek, joǵaryda atalǵan ósim úshin úsh jylǵa 2,9 trıllıon teńge nemese jyl saıyn orta eseppen 1 trln teńge qajet. Sonymen birge, biz azamattardyń kirisiniń ósýine tek bıýdjet esebinen qol jetkizýge bolmaıtynyn túsinemiz. Eńbekke qabiletti jastaǵy halyqtyń 80% jeke sektorda jumys isteıdi. Sondyqtan naqty sektordy damytýǵa basa nazar aýdarý kerek. Munda eki negizgi aspekt bar: qarjy men ótkizýdiń qoljetimdi bolýy», - dedi T. Qulybaev QR Parlamenti Májilisinde ótken depýttarmen kezdesýde
Onyń aıtýynsha, naqty sektordy nesıeleýde turalaý baıqalady. Qazirgi ýaqytta bankterdiń nesıe portfeli 13,4 trln teńgeni quraıdy. Ótken jylmen salystyrǵanda zańdy tulǵalarǵa berilgen nesıe kólemi 5,4% tómendegen. Shaǵyn jáne orta bıznes nesıesi 12,5% tómendedi. 2018 jyly JІÓ-degi banktik qaryzdardyń úlesi 56,5%-dan 21,2%-ǵa deıin tómendedi. Ortasha kásiporyndardyń sany da azaıyp, negizgi kapıtalǵa ınvestıtsııa azaıyp keledi.
Sondaı-aq, T.Qulybaev 2019 jyldyń qazan aıynda júrgizilgen jedel saýalnama nátıjesin aıtyp, óndiristik kásiporyndardyń 60%-ynda aınalym qarajatyn alýǵa nesıe alý problemalary bar ekenin jetkizdi. Bul kóbinese bankterdiń joǵary suranysyna, nesıe stavkasynyń joǵary deńgeıine jáne kepildik bazanyń bolmaýyna baılanysty kórinedi.