Eńbekke qabiletti birde-bir áıel jumyssyz qalmaýy tıis - Gúlshara Ábdiqalyqova

ASTANA. QazAqparat - Búgin QR Memlekettik hatshysy, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy G.N.Ábdiqalyqovanyń tóraǵalyǵymen selektorlyq rejimde Astana, Almaty qalalary men oblys ákimderiniń orynbasarlary, ákimder janyndaǵy áıelder isteri jáne otbasylyq-demografııalyq saıasat jónindegi komıssııa tóraǵalarynyń qatysýymen keńes ótti. Bul týraly Ulttyq komıssııa hatshylyǵynan habarlady.

Keńeste Áıelder isteri jáne otbasylyq-demografııalyq saıasat jónindegi ulttyq komıssııa jumysyndaǵy Memleket basshysynyń «Nurly jol - Bolashaqqa bastar jol» Joldaýynyń negizgi erejelerin iske asyrýǵa arnalǵan 2015 jyldyń negizgi baǵyttary belgilendi.

Memlekettik hatshy keńeske qatysýshylardyń nazaryn áıelderdiń jumyspen qamtylýy, bıznestiń áleýmettik jaýapkershiligin arttyrý, áıelder kásipkerligine qoldaý kórsetý máselelerine aýdardy. «Eńbekke qabiletti jáne jumys isteýge múmkindigi bar birde-bir áıel jumyssyz qalmaýǵa tıis!», - dedi Gúlshara Ábdiqalyqova. G.N. Ábdiqalyqova Assambleıa jyly, Qazaqstan Konstıtýtsııasynyń 20 jyldyǵy, Qazaq handyǵynyń 550 jyldyǵy, Jeńistiń 70 jyldyǵy aıasynda ótetin barlyq kásibı merekelerdi, qoǵamdyq-buqaralyq is-sharalardy «Bizdiń kúshimiz - birlikte!» uranyn qoldana otyryp, ótkizýdi qamtamasyz etýdi tapsyrdy. Memlekettik hatshy óńir ákimderiniń orynbasarlaryna Jeńistiń 70 jyldyǵyn merekeleý aıasynda Prezıdenttiń Uly Otan soǵysynyń ardagerlerine qoldaý kórsetý jónindegi bastamalaryn iske asyrýdy qamtamasyz etýdi, sonyń ishinde áıelderden shyqqan soǵys ardagerleriniń, maıdangerler áıelderiniń, tyldaǵy eńbekshi áıelderdiń sińirgen eńbekterin atap ótýdi tapsyrdy. Selektorlyq keńestiń qorytyndysy boıynsha Memlekettik hatshy G.N.Ábdiqalyqova birqatar naqty tapsyrmalar berdi.