Eńbekaqysyna 30 paıyz ústemeni alý úshin muǵalimder biliktilik emtıhanyn tapsyrady
ASTANA. 21 maýsym. QazAqparat - Bıylǵy 23 maýsymda Astanadaǵy Nazarbaev Zııatkerlik mektebinde Qazaqstan Respýblıkasynyń jalpy bilim berý mektepterindegi pedagogtardyń biliktiligin arttyrý kýrsynyń baǵdarlamasyn iske asyrý maqsatynda 364 astanalyq ustazdar úshinshi bazalyq deńgeılik muǵalim sertıfıkatyn alý úshin emtıhanyn tapsyrady.
«Nazarbaev Zııatkerlik mektepteri» DBBU baspasóz qyzmetiniń málimetinshe, jalpy memleket boıynsha emtıhannan 3278 muǵalim -úmitker 17 qalada ótedi. Biliktilik emtıhanyn sátti tapsyrǵan muǵalimder eńbekaqysyna 30 paıyz ústemeni alýǵa ruqsat beretin úshinshi deńgeıli muǵalim sertıfıkatyn alady.
Biliktilik emtıhany muǵalimderdi baǵalaýdyń qorytyndy úrdisi bolyp tabylady jáne baǵdarlamanyń modýlderi men negizgi ıdeıasyn qamtıtyn Kembrıdj daıyndaǵan testilik suraqtardan turady. Biliktilik emtıhanyn ótkizý úrdisi aıqyn jáne syrtqy baqylaýshylardyń qatań baqylaýynda bolady.
2011 jyly QR Bilim jáne ǵylym mınıstirligi qazaqstandyq pedagogtardyń biliktiligin eń myqty álemdik tájirıbege negizdelgen jańa formatta arttyrý yntasyn bildirdi. Kýrstardyń baǵdarlamasy «Nazarbaev Zııatkerlik mektebi» DBBU men Kembrıdj Ýnıversıtetiniń bilim berý Fakýltetimen (Ulybrıtanııa ázirlengen.
Baǵdarlama aıasynda 2012 jyldyń qańtar-naýryz aılary arasynda pedagogıkalyq sheberlik ortalyǵy Nazarbaev Zııatkerlik mektepterindegi, sonymen birge «Órleý» AQ ulttyq biliktilikti arttyrý ortalyǵyndaǵy jáne pedagogıkalyq ýnıversıtetter men ınstıtýttar qaramaǵyndaǵy aımaqtyq biliktilikti arttyrý ortalyqtaryndaǵy eń myqty muǵalimderden 286 qazaqstandyq jattyqtyrýshy daıyndady.
Qazaqstan Respýblıkasy muǵalimderiniń biliktiligin jańa sapaly ádispen arttyrýǵa negizdelgen baǵdarlama muǵalimderdiń sabaq berý men oqytýdaǵy jańa ádisterin jáne úzilissiz ózin-ózi jetildirý men kásibı damýdy qamtamasyz etetin óz tájirıbesin damytýǵa baǵyttalǵan.
