Eńbekaqy kóp, zeınetaqy aýdarymy eki ese az – mınıstr kóleńkeli jumys oryndary týraly
ASTANA. KAZINFORM – Eńbek jáne halyqty áleýmettik qorǵaý mınıstri Svetlana Jaqypova Qazaqstannyń eńbek naryǵyndaǵy birqatar ózekti máseleni atady. Máselen, kásipkerlikti damytý baǵdarlamalary sońǵy jylda aıtarlyqtaı nátıje kórsetken joq.
«Sońǵy 5 jyl elimiz úshin aıtarlyqtaı ózgerister men synaqtar kezeńi boldy. Biz ekonomıkalyq daǵdarysty, COVID-19 pandemııasyn, sondaı-aq eńbek naryǵyna aıtarlyqtaı áser etken birqatar ishki qıyndyqtardy da basymyzdan ótkerdik. Eń bastysy osy qıyndyqtarǵa qaramastan, biz eńbek naryǵynda turaqtylyqty saqtaı aldyq», - dep atap ótti mınıstr Májiliste «Qazaqstannyń eńbek naryǵyn damytý jáne kadrlyq áleýetin nyǵaıtý» atty Úkimet saǵatynda.
Onyń aıtýynsha, Qazaqstannyń eńbek naryǵynyń turaqty ósýine qaramastan, memlekettiń teń múmkindikterdi qamtamasyz etip, ómir súrý sapasyn arttyrýy úshin odan ári kúsh salýdy talap etetin birqatar osal tustar anyqtalǵan.
«Birinshisi – eńbek naryǵynda usynystardy jasaý. Máselen, memleket kásipkerlikti damytýǵa jáne ındýstrııalandyrýǵa baǵyttalǵan baǵdarlamalardy iske asyrýda. Alaıda, sońǵy 10 jylǵy statıstıka kórsetkendeı, bul baǵdarlamalardyń áseri jetkiliksiz. Degenmen, memlekettiń ekonomıkany yntalandyrý boıynsha qabyldaǵan belsendi sharalaryna qaramastan, jeke bıznestiń jańa jumys oryndaryn qurýǵa qosqan úlesi shamamen 20 paıyzdy ǵana quraıdy. Bul Ekonomıkalyq yntymaqtastyq pen damý uıymy elderimen salystyrǵanda 4 ese az», - dedi S. Jaqypova.
Tıisinshe, búginde jumys oryndarynyń ósimin ónimdiligi tómen salalar men memlekettik sektor qamtamasyz etýde. Bul protsestiń janama saldary – Qazaqstannyń EYDU elderinen eńbek ónimdiligi boıynsha úsh ese artta qalǵany.
«Ekinshi syn-qater – formaldy emes jumyspen qamtýdyń joǵary deńgeıi. 2023 jyly naqty zeınetaqy aýdarymdarynyń derekteri boıynsha eseptelgen eńbekaqy tóleý qorynyń kólemi 20 trln teńgeni qurady. Óz kezeginde, Ulttyq statıstıka bıýrosynyń baǵalaýynsha eńbekaqy tóleý qory eki ese kóp – 38 trln teńge. Eńbekaqy qory boıynsha derekterdiń edáýir alshaqtyǵy saýda, aýyl sharýashylyǵy jáne jyljymaıtyn múlik sektorlarynda baıqalady. Mınıstrliktiń aı saıynǵy derekqor monıtorıngi ulttyq jobalar sheńberinde jumysqa ornalastyrylǵan árbir tórtinshi adamnyń mindetti zeınetaqy jarnalary joq ekenin kórsetip otyr», - dedi Eńbek mınıstri.
Sonymen birge, ekonomıkanyń orta kásiptik bilimi bar kadrlarǵa qajettiligi artyp keledi. Bul rette bıznes tarapynan suranys pen jumys kúshine usynys arasyndaǵy sáıkessizdik baıqalyp otyr.
«Kásiptik-tehnıkalyq bilimi bar mamandarǵa suranys joǵary bilimi bar túlekterge qajettilikten 70% artyq. Biliktiligi ortasha jáne joǵary deńgeıdegi jumys kúshine usynys kólemi birdeı bolyp qalýda», - dedi S. Jaqypova.
