«Eńbek joly» respýblıkalyq baıqaýy: Jeńimpazdar úshin onlaı-daýys berý bastaldy
NUR-SULTAN. QazAqparat – QR Eńbek jáne halyqty áleýmettik qorǵaý mınıstrliginiń resmı saıtynda «Eńbek joly» respýblıkalyq baıqaýynyń onlaın-daýys berý kezeńi bastaldy, dep habarlaıdy QazAqparat.
2019 jylǵy úzdik eńbek áýletteri men óndiris jumysshylaryn anyqtaýǵa baǵyttalǵan baıqaýdyń sońǵy kezeńine Qazaqstannyń 17 aımaǵynan 51 úmitker ótti.
Daýys berý nátıjesimen respýblıkalyq komıssııa «Úzdik eńbek áýleti» (eń uzaq eńbek ótili, eń kóp marapattary bar áýlet), «Úzdik jas óndiris qyzmetkeri» (5 jyldan artyq emes jumys ótili bar eń belsendi jáne eńbekqor óndiris qyzmetkeri) jáne «Jumys isteıtin jastardyń úzdik tálimgeri» (20 jyldan kem emes jumys ótili bar tálimger) nomınatsııalary boıynsha jeńimpazdardy anyqtaıtyn bolady.
«Onlaın daýys berý bıylǵy 3 qarashaǵa deıin jalǵasady. «Eńbek joly» baıqaýynyń jeńimpazdaryn marapattaý osy qarasha aıynda Nur-Sultan qalasynda «Áleýmettik ınnovatsııalar Jalpyǵa ortaq eńbek qoǵamyna aparar jol retinde» atty respýblıkalyq forýmda ótedi.
Ár daýystyń mańyzdylyǵyn eskere otyryp, QR Eńbek jáne halyqty áleýmettik qorǵaý mınıstrligi Qazaqstannyń barlyq azamatyn onlaın-daýys berýge belsendi qatysýǵa shaqyrady», - delingen vedomstvonyń aqparatynda.
Esterińizge sala keteıik, «Eńbek joly» baıqaýy 2016 jyly qurylǵan.
