«Eńbek» jáne «Jumyspen qamtýdyń jol kartasy» baǵdarlamalarynyń qorytyndysy qaraldy

NUR-SULTAN. QazAqparat - Búgin QR Premer-Mınıstriniń orynbasary Eraly Toǵjanovtyń tóraǵalyǵymen Jumyspen qamtý máseleleri jónindegi vedomstvoaralyq komıssııanyń otyrysy ótti. Onda «Eńbek» jáne «Jumyspen qamtýdyń jol kartasy» baǵdarlamalaryn iske asyrýdyń bıylǵy 7 aıdaǵy qorytyndysy tyńdaldy, dep habarlaıdy QazAqparat tilshisi.

Eńbek jáne áleýmettik qorǵaý mınıstrligi «Eńbek» baǵdarlamasy aıasynda jyl basynan beri jumyspen qamtý sharalarymen 335 myń qazaqstandyq qamtylǵanyn habarlady.

Degenmen, birqatar óńirlerde baǵdarlamany iske asyrýdyń qarqyny tómen ekendigi baıqalady: Nur-Sultan qalasynda - shaǵyn nesıe, grant berý, jastar praktıkasy boıynsha; Almaty qalasynda - jastar praktıkasy jáne qoǵamdyq jumystar boıynsha; Atyraý oblysynda - turaqty jumys oryndaryn qurý boıynsha.

Sondaı-aq «Jumyspen qamtýdyń jol kartasy» baǵdarlamasy aıasynda 6,3 myń joba iske asyryla bastap, 153 myń jumys orny ashylǵany baıandaldy.

Qostanaı oblysynda jumysqa ornalastyrý boıynsha tómen qarqyn tirkeldi; basqa aýdandardan kelgenderge kóterme aqy tóleý boıynsha Almaty qalasynda, Túrkistan jáne Aqmola oblystarynda oryndalmaı otyr.

Premer-Mınıstrdiń orynbasary óńirlerdiń ákimdikteriniń esepterin tyńdap, halyqty jumyspen qamtý boıynsha jumysty jandandyrý jóninde jedel sharalar qabyldaý qajettigin atap ótti.

Sondaı-aq otyrysta «Jumyspen qamtýdyń jol kartasy» jobalarynyń tıimdilik ólshemderi bekitildi.

«Memleket basshysynyń tapsyrmasy boıynsha bizdiń aldymyzda Baǵdarlamaǵa bólingen 1 trln teńgeni barynsha tıimdi paıdalaný mindeti tur. Árbir joba boıynsha áleýmettik-ekonomıkalyq tıimdilik muqııat baǵalanatyn bolady: qansha jańa jumys orny quryldy, salyq túsimderiniń ósý qarqyny, adamdardyń turmys sapasyna áseri jáne t. b. Baǵdarlamanyń tıimdiligin Úkimet erekshe baqylaýda ustaıdy», — dep qorytyndylady E. Toǵjanov.