Eńbek jáne halyqty áleýmettik qorǵaý vıtse-mınıstri Tólebı turǵyndarymen kezdesti
LEŃGІR. QazAqparat – Túrkistan oblysy Tólebı aýdanyndaǵy jumyspen qamtý ortalyǵyna Qazaqstan Respýblıkasynyń eńbek jáne halyqty áleýmettik qorǵaý vıtse-mınıstri Erjan Jylqybaev jumys saparymen keldi. Ol ortalyqtyń jumysymen etene tanysyp, jergilikti halyqpen júzdesti, dep habarlaıdy QazAqparat tilshisi.
Vıtse-mınıstr halyqty jumyspen qamtý ortalyǵy bólimderin aralap kórip, onyń ishinde klıenttermen jumys jasaý jáne «AÁK eńbek naryǵy» bazasyn, «E-halyq» AJ-de AÁK túrin anyqtaý úshin eńbekke qabiletti adamdardyń áleýmettik mártebesiniń durys belgilenýin tekserdi.
Sonymen qatar, shartty aqshalaı kómek alýshylar arasynda áleýmettik kelisimsharttyń barlyq sharttaryn jasasý jáne saqtaý faktisiniń sapasyn qarap shyqty. Halyqty jumyspen qamtý ortalyǵy usynǵan memlekettik qyzmetterge toqtalyp, onyń tıimdi tustaryn sóz etti. Shaǵyn nesıe berý, kásiptik oqytý, jańa formattaǵy ataýly áleýmettik kómekter men jumys berýshilermen kelisim-sharttardy zańdastyrý boıynsha belsendi jumystar týraly keńester berdi. Sonymen qatar, halyqqa qyzmet kórsetý zalyn, jumys izdeýshiler bólimi jáne jumys berýshilerge qoldaý kórsetý aımaǵyn aralap, jumys nysandarymen tanysty.
Bul kúni aýdanda sondaı-aq, bos jumys oryndarynyń jármeńkesi ótti. Aýdandyq halyqty jumyspen qamtý ortalyǵynyń uıymdastyrýymen ótken sharada 60 jumys berýshi mekemelerden 342 bos jumys oryndary jáne qysqa merzimdi kásiptik oqý kýrstarynan 7 mamandyq boıynsha 92 oryn usynyldy. Bos oryndar jármeńkesine 130-dan astam adam qatysyp, 67 adamǵa jumysqa joldama berildi. Qalǵan azamattar jumys oryndary boıynsha jumys berýshilermen áńgimelesý júrgizip, keńes aldy jáne qysqa merzimdi kásiptik oqý kýrstaryna ótinish bildirdi.
