Eńbek jáne halyqty áleýmettik qorǵaý mınıstrligi jumyspen qamtýdyń jańa baǵdarlamasyn ázirleýde
ASTANA. Qazannyń 18‑i. QazAqparat /Qanat Mámetqazyuly/ -Eńbek jáne halyqty áleýmettik qorǵaý mınıstrligi jumyspen qamtýdyń jańa baǵdarlamasyn ázirleýde. Bul týraly búgin QR Parlamenti Májilisinde ótken Úkimet saǵatynda QR Eńbek jáne halyqty áleýmettik qorǵaý mınıstri Gúlshara Ábdihalyqova málim etti.
Mınıstrdiń aıtýynsha, jańa baǵdarlama birneshe baǵytty qamtıtyn bolady. «Atap aıtqanda birinshiden, ındýstrııalyq‑ınnovatsııalyq damý baǵdarlamasy sheńberinde salalardyń eńbek resýrstaryna qajettiliginiń monıtorıngi men ǵylymı negizdelgen boljamyn qamtıdy. Ekinshiden, halyqtyń ekonomıkalyq belsendiliginiń tabıǵı ósimin, ishki eńbek resýrstary rezerviniń paıdalanylýy men sheteldik jumys kúshin tartýdy eskere otyryp elimizdiń eńbek resýrstary teńgerilimin ázirleý qarastyrylady. Úshinshiden, adam resýrstarynyń sapasyn arttyrý jáne kásiptik bilim berý júıesin jetildirý, onyń ishinde jumys berýshilerdiń personaldy daıarlaýǵa jáne qaıta daıarlaýǵa degen ekonomıkalyq ýájdemesin paıdalana otyryp jetildirý kózdeledi. Tórtinshiden, ózin ózi jumyspen qamtyǵan halyqtyń úles salmaǵyn tómendetý jáne onyń sharttaryn ońtaılandyrý kózdeledi. Jalpy jumyspen qamtý strategııasy sheńberinde eńbek qatynastaryn zańdastyrý, az qamtamasyz etilgen jáne ózin ózi jumyspen qamtyǵan halyqty tıimdi jumyspen qamtýǵa járdemdesý jónindegi Jalpyulttyq is-sharalar josparyn ázirleý jáne iske asyrý qarastyrylady», dedi mınıstr.
Budan bólek, atalmysh baǵdarlamada eńbek resýrstarynyń utqyrlyǵyn arttyrý, jumysqa ornalasýǵa járdemdesý jáne halyqtyń nysanaly toptaryna - jastarǵa, áıelderge, zeınetkerler men múmkindigi shekteýli adamdarǵa jáne t.b. arnalǵan jumyspen qamtýdyń ıkemdi nysandaryn paıdalaný sharalary da qamtylyp otyr. Eńbek kóshi-qonyn basqarýdy jetildirýdegi eńbek resýrstarynyń sapasyn arttyrýǵa, ekonomıkanyń bilikti jumys kúshine degen qajettilikterin qamtamasyz etýge, ulttyq eńbek naryǵynyń ıkemdiligin kúsheıtýge baǵyttalǵan sharalar da qarastyrylady. «Buǵan qatysty usynylyp otyrǵan jańalyqtar eńbekshi mıgranttar aǵynynyń arajigin (sheteldik qyzmetkerler, ózin ózi jumyspen qamtyǵandar, maýsymdyq qyzmetkerler) ajyratý jáne olardyń árqaısysyna qatysty qabyldaý men paıdalanýdyń saralanǵan sharttaryn qoldaný bolyp tabylady. Mysaly, etnıkalyq qazaqtar men otandastarymyzdyń qataryndaǵy bilikti mamandarǵa óziniń mamandyǵy boıynsha jumysqa ruqsat ótinish berýshini osy nemese ózge jumys berýshige nemese qyzmet túrine bekitpesten beriletin bolady. Jalpy, búgingi kúni tıimdi jumyspen qamtamasyz etý - bul jańa jumys oryndaryn ashý ǵana emes, zamanaýı sapadaǵy, eńbek jaǵdaılary qaýipsiz, tehnıkalyq jaraqtandyrylǵan jáne laıyqty jalaqysy bar jumys oryndaryn berý bolyp tabylady»‑, dedi mınıstr.
