Eńbek jáne halyqty áleýmettik qorǵaý mınıstrligi zeınetaqy júıesin jetildirý jóninde usynystar daıyndaýda
ASTANA. Aqpannyń 26-sy. QazAqparat /Aıdar Ospanalıev/ - Respýblıkanyń ekologııasy las aımaqtarda turatyn turǵyndar Eńbek jáne halyqty áleýmettik qorǵaý mınıstrligine shaǵymdanyp, zeınetkerlikke merziminen buryn shyǵý jónindegi jeńildikterdi qaıta qalpyna keltirýdi talap etýde. Bul týraly búgin «Nur Otan» partııasynyń qoǵamdyq qabyldaý oryndarynyń jumysyna baılanysty ótken májiliste Eńbek jáne halyqty áleýmettik qorǵaý mınıstrliginiń jaýapty hatshysy Tamara Dúısenova málim etti,
dep habarlaıdy QazAqparat.
Onyń aıtýynsha, ótken jyly mınıstrlik ókilderine turǵyndardan kelip túsken aryzdar men shaǵymdar sany 37 myńdy quraǵan. Olardyń 12 myńy jeke tulǵalardan kelgen. Sondaı-aq shaǵymdardyń 50 paıyzy TMD elderinde turyp jatqan respýblıkanyń burynǵy turǵyndarynan kelipti. «Atalǵan aryzdardy jiktep qaraıtyn bolsaq, olardyń basym bóligi zeınetaqymen qamtamasyz etýge qatysty. Búginde osy máselemen ótinish jasaǵan azamattardy úsh túrge jikteýge bolady. Olardyń birinshisi - zeınetaqy kólemi óte az dep eseptese, ekinshileri ekologııalyq jaǵynan jaısyz aımaqtarda turady. Olar ózderiniń zeınetke merziminen buryn shyǵý jónindegi jeńildikterdi qaıtarýdy suraıdy. Al úshinshi toptaǵy azamattar negizinen áskerıler», dedi jaýapty hatshy.
Onyń aıtýynsha, mınıstrlik ókilderi osy máseleler boıynsha, ıaǵnı zeınetaqy júıesin jetildirý jóninde eki jyldan beri tıisti zertteý jumystaryn júrgizip keledi. Osy jumystar negizinde qazir mınıstrlik arnaıy usynystar daıyndap otyr. Turǵyndardyń zeınetaqyǵa qatysty kóterip otyrǵan máseleleri bar ekeni ras jáne biz buǵan zeınetaqyǵa qatysty daıyndap jatqan usynystarmyzda olardy tolyqtaı qamtımyz», dedi T.Dúısenova.
