Eńbek jáne halyqty áleýmettik qorǵaý mınıstrligi qosymsha zeınetaqy aýdarymdaryn engizýdi usyndy
ASTANA. 12 naýryz. QazAqparat - Eńbek jáne halyqty áleýmettik qorǵaý mınıstrligi eńbekaqy tóleý qorynan 5 paıyz kóleminde mindetti kásibı jarna engizýdi usyndy. Bul týraly búgin QR Parlamenti Májilisinde «Qazaqstan Respýblıkasyndaǵy zeınetaqymen qamsyzdandyrý týraly» jańa redaktsııadaǵy zań jobasyn tanystyrý rásiminde Eńbek jáne halyqty áleýmettik qorǵaý mınıstri Serik Ábdenov málim etti.
Mınıstrdiń málimetine qaraǵanda, 2013 jylǵy 1 qańtarda mindetti kásiptik zeınetaqy júıesine qatysýshylardyń sany 4225 adamdy quraıdy. Olardyń zeınetaqy jınaqtarynyń kólemi 133,9 mln. teńgeni quraǵan. «Jalpy elimizde erikti zeınetaqy jınaqtaý júıesi damymaı otyr jáne bunyń erekshe jaǵdaıda jumys isteıtinderdiń shyǵynyn ótemeıtinin aıtý kerek. Osyǵan oraı, mindetti zeınetaqy jarnasyna (10%) qosa, eńbekaqy tóleý qorynan 5 paıyz kóleminde mindetti kásibı jarna aýdarýdy usynyp otyrmyz. Jumys berýshiler mindetti kásibı zeınetaqy jarnasyn zııandy dep tanylǵan óndiriste eńbek etetinder úshin ǵana tóleıdi. Óndiris túrleri men zııandy kásipter tizimin Úkimet anyqtaıdy. Soǵan oraı, jumys berýshiler mindetti kásiptik zeınetaqy jarnasyn Úkimet bekitetin jáne kezeń-kezeńimen qaralatyn zııandy kásipterdiń tizbesi boıynsha aýdaratyn bolady», - dedi mınıstr. Onyń sózine qaraǵanda, bundaı kásiptik zeınetaqy júıesine qatysýshylar sany boljam boıynsha 135 myń adamdy quramaq.
