Eńbek jáne halyqty áleýmettik qorǵaý mınıstrligi ishki kóshi-qon máselesin qoǵamdyq uıymdarmen birlesip rettemek

ASTANA. Sáýirdiń 1-i. QazAqparat /Aıdar Ospanalıev/ - Búgin Eńbek jáne halyqty áleýmettik qorǵaý mınıstri Gúlshara Ábdihalyqova men «Shańyraq» qoǵamdyq birlestiginiń tóraǵasy Asylbek Qojahmetov ishki kóshi-qonnyń quqyqtary men bostandyqtaryn saqtaý salasyndaǵy yntymaqtastyq týraly memorandýmǵa qol qoıdy,

dep habarlaıdy QazAqparat.

Qujatqa qol qoıý barysynda memorandýmnyń maqsat-mindetterine toqtalǵan Eńbek jáne halyqty áleýmettik qorǵaý mınıstri Gúlshara Ábdihalyqovanyń sózine qaraǵanda, mınıstrlik qoǵamdyq uıymdarmen baılanysty barynsha jetildirip otyr. «Osy ýaqytta mınıstrlik ókilderi múmkindigi shekteýli jandardyń máseleleri boıynsha qoǵamdyq uıymdarmen birlesip, zertteýler júrgizip, qalyptasqan máseleni sheshýge baǵyttalǵan arnaıy baǵdarlamalar daıyndaýda. Sonymen qatar, zeınetkerlerdiń máseleleri de bizdiń basty nazarymyzda. Osy baǵyttaǵy jumystardyń eń úlken ári mańyzdylarynyń biri - kóshi-qonmen baılanysty. Osy kezde el Parlamentinde kóshi-qonǵa qatysty jańa zań qaralýda. Onda ishki mıgratsııaǵa qatysty aýqymdy máseleler qamtylǵan. Qazirgi tańda elimizde bir oblystan ekinshi oblysqa nemese aýyldan qalaǵa demekshi, kóship-qoný úderisi erekshe jandanyp tur. Bul máseleni jalǵyz memlekettik organdardyń tolyqtaı retteýi múmkin emes. Sondyqtan biz búgin qoǵamdyq uıymdarmen birlesip jumys júrgizgendi jón sanap otyrmyz. Búgingi bizdiń qol qoıǵaly otyrǵan qujatymyz osyndaı máselelerdi qamtıdy», dedi mınıstr.