Eńbek jáne halyqty áleýmettik qorǵaý mınıstri Jambyl oblysyna sapary barysynda «Jumyspen qamtý -2020» baǵdarlamasynyń barysymen tanysty
ASTANA. 21 shilde. QazAqparat - Búgin QR Eńbek jáne halyqty áleýmettik qorǵaý mınıstri Gúlshara Ábdiqalyqovanyń Jambyl oblysyna jumys sapary bastaldy. Sapardyń maqsaty aǵymdaǵy shilde aıynan bastap júzege asa bastaǵan «Jumyspen qamtý-2020» memlekettik baǵdarlamasynyń oryndalýy jónindegi sharalarmen tanysý bolyp tabylady.
Bul týraly QR Eńbek jáne halyqty áleýmettik qorǵaý mınıstrliginiń baspasóz qyzmetinen habarlandy.
Esterińizge sala keteıik, Memleket basshysynyń tapsyrmasymen ázirlengen jańa baǵdarlamanyń basty maqsaty jumyssyzdar men az qamtylǵan ózin-ózi eńbekpen qamtyǵan qazaqstandyqtardy jumyspen qamtý, sol arqyly eldegi jumyssyzdyq pen kedeılik deńgeıin tómendetý bolyp tabylady. Bul rette aǵymdaǵy jyldyń ekinshi jartyjyldyǵynda Jambyl oblysy boıynsha ilki rejımde baǵdarlamanyń eki baǵytymen jalpy somasy 816,7 mln. teńgege 1656 adamdy qamtý josparlanǵan. Bundaǵy birinshi baǵyt kásibı daıarlaý jáne óz betinshe jumyspen qamtylǵandardyń, az qamtylǵan otbasylar men jumyssyzdardyń turǵylyqty jerleri boıynsha qaıta daıarlaý jáne biliktilikterin arttyrý kýrstaryn ótkizý jolymen halyqtyń eńbekpen qamtylýynyń ónimdiligin, ornyqtylyǵyn qamtamsyz etýge baǵyttalady. Jumyssyzdar oqyp, biliktiligin qaıta arttyrady. 1462 adam kásibı bilim kýrstarynda oqysa, onyń ishinde 637 adam kásibı daıarlyqtan, al 783 adam qaıta daıarlaýdan ótedi. Biliktilikti arttyrýǵa 42 adam joldanady, bul baǵyttaǵy qarjylandyrýǵa 635,6 mln. teńge qarastyrylǵan. Búgingi kúni kásibı bilim beretin mekemeler men oqýǵa kandıdattar tolyq anyqtalyp, oqý úrdisi de bastalyp ketti.
Baǵdarlamanyń ekinshi baǵyty «Aýyldaǵy kásipkerlikti damytý» boıynsha oblystan 20 adam qatysatyny josparlanǵan. Kandıdattardy kásipkerlik negizderine oqytý úshin 875 myń teńge qarastyrylsa, shaǵyn nesıege - 20 mln. teńge, ınjenerlik-kommýnıkatıvtik ınfraqurylymdardy damytýǵa 20 mln. teńge, bólinedi.
Baǵdarlamanyń úshinshi baǵyty «Eńbek resýrstarynyń utqyrlyǵyn arttyrý» boıynsha ekonomıkalyq áleýeti tómen aýyldy eldi mekenderde turyp jatqan jumyssyzdardy, az qamtylǵandardy, sondaı-aq óz betinshe jumyspen qamtylǵandardy ekonomıkalyq áleýeti joǵary ortalyqtarǵa kóshirý maqsaty kózdeledi. Osy sanattaǵylar úshin jaldamaly turǵyn úı máselesin sheshý qarastyrylady. Bul rette ekonomıkalyq áleýeti tómen 3745 adamy bar 12 eldi mekennen 535 otbasyn kóshirý josparlanady. Ekonomıkalyq damyǵan ortalyqtarǵa osy sanattaǵy otbasylar úshin 55 jeke turǵyn úıler salynady. Buǵan 516,4 mln. teńge jumsaý kózdelgen. 480 páterden turatyn 19 kópqabatty úı salýǵa 3 mlrd. 337 mln. teńge jumsalady. Al ondaı otbasylardy kóshirýge 65,3 mln.teńge qarastyrylady.
Baǵdarlamanyń atalǵan 3 baǵytyn júzege asyrý nátıjesinde 2011-2014 jyldar aralyǵynda oblysta 10235 adam jumyspen qamtylyp, bul sharalarǵa 8 mlrd. 728 mln.teńge jumsaý kózdeledi (jergilikti bıýdjettiń 10 paıyzy). Osyǵan oraı, 2015 jylǵa qaraı birqatar nysanaly ındıkatorlarǵa qol jetkizý mejelenedi. Atap aıtqanda, jumyssyzdyq deńgeıi 5,5 paıyzdan aspaıdy, eń tómengi kúnkóris deńgeıinen tabysy tómen jurtshylyq úlesi 5,1 paıyzǵa deıin azaıady, eńbekpen qamtylǵandar arasyndaǵy ózin ózi jumyspen qamtyǵandar úlesi (288 myń adam - 52 paıyz) 3,6 paıyzǵa tómendeıdi. Baǵdarlamany júzege asyrý esebinen eńbek ónimdiliginiń qosymsha ósimi 23 paıyzdy quraıdy.
Toqtala ketetin jaıt, Jambyl oblysyna sapary barysynda mınıstr G. Ábdiqalyqova jumyssyz azamattardy kásiptik oqytyp, odan keıin jumysqa ornalastyrýdy qarastyratyn №1 kásiptik lıtseıde boldy, ondaǵy jumystarmen tanysty. Sondaı-aq mınıstr Baızaq, Jambyl aýdandarynyń eńbekpen qamtý ortalyqtarynda bolyp, «Jumyspen qamtý-2020» baǵdarlamasy: ony júzege asyrýdyń negizgi qadamdary» taqyrybynda semınar-keńes ótkizdi.
