Eńbek jáne halyqty áleýmettik qorǵaý mınıstri zeınetaqy qorlary jumystaryndaǵy túıtkilderdi moıyndady
ASTANA. 24 qańtar. QazAqparat - QR Eńbek jáne halyqty áleýmettik qorǵaý mınıstri Serik Ábdenov elimizdiń zeınetaqy jınaqtaýshy qorlary jumystarynyń tıimsizdigin moıyndady.
Búgin Astanada ótken brıfıngte mınıstr Elbasynyń atalǵan qorlardyń qyzmetine qatysty syn tezinen keıin Úkimet Dúnıejúzilik banktiń sarapshylarymen birlese bul qarjylyq qurylymdardyń 1998 jyldan bergi jumysyna taldaý jasaǵanyn jetkizdi.
Sheteldik sarapshylar tekserýlerden keıin birqatar problemalardy anyqtaǵan kórinedi. Mınıstrlik tarapynan salymshylardyń esep-shottarynyń jaǵdaıyn zerdeleý bastamasy kóterilip, óz kezeginde esep-shottardy esepteýler turǵysynda túrli túıtkilderdiń beti ashyldy.
S. Ábdenovtyń sózine qaraǵanda, 700 myńnan astam jeke zeınetaqy esep-shottary qazirgi tańda paıdalanylmaǵany belgili boldy. Bul turǵyda qaıtys bolǵan adamdardyń jınaqtaý shottary, qonys aýdarǵan azamattardyń, sondaı-aq múgedektik toby berilýine baılanysty tólemder aýdarylmaǵan esep-shottar bar . Osy jumystyń aıasynda zeınetaqy jınaqtaýshy qorlaryna tıisti baǵa berildi.
Sóz sońynda ol Prezıdenttiń Biryńǵaı zeınetaqy qoryn qurý týraly tapsyrmasy zeınataqy jınaqtaýshy salasyndaǵy ahýalǵa qatysty ýaqytyly jasalǵan qadam ekenin atap ótti.
