Eńbek jáne halyqty áleýmettik qorǵaý mınıstri Gúlshara Ábdihalyqova qarttardy halyqaralyq merekemen quttyqtady
ASTANA. Qazannyń 1-i. QazAqparat /Aıdar Ospanalıev/ - Búgin -Halyqaralyq qarttar kúni. Osyǵan oraı Eńbek jáne halyqty áleýmettik qorǵaý mınıstri Gúlshara Ábdihalyqova «Astanadaǵy qarttar men múmkindigi shekteýli jandarǵa arnalǵan medıtsınalyq-áleýmettik mekemesinde» bolyp,
qarttardy búgingi merekelerimen quttyqtady.
«Bıylǵy jyl erekshe jyl. Sebebi bıyl Uly Jeńiske 65 jyl tolyp otyr. Osyǵan baılanysty biz jyl boıyna qarttardyń, onyń ishinde Uly Otan soǵysy ardagerleriniń máselelerin sheship, olarǵa barynsha kóńil bólýge tyrystyq. Sonymen qatar, búgin halyqaralyq mereke. Ol respýblıkamyzdyń barlyq aımaqtarynda keńinen atalyp ótýde. Ár aımaq shama-sharqyna qaraı qarttarǵa qurmet kórsetip, qolushyn sozýǵa umtylýda. Sondaı-aq qarttarǵa arnalyp, túrli merekelik sharalar uıymdastyrylýda. Elordamyz Astanada da búgin úlken merekelik kontsert uıymdastyrylǵaly otyr», G.Ábdihalyqova.
Mınıstr sonymen qatar medıtsınalyq mekemeniń qyzmetimen, onda qarttarǵa jasalǵan jaǵdaımen tanysyp, mekemede ómir súrip jatqan Uly Otan soǵysy ardagerleriniń hal-ahýaldaryn bilip qaıtty.
Mınıstrdiń málimetterine qaraǵanda, respýblıkamyzda qarttar turatyn 49 medıtsınalyq mekeme bar. Onda 6 myńnan astam adam bar. «Qazirgi tańda elimizde mundaı úılerdiń qatar kóbeıe bastady. Respýblıkamyzdyń aımaqtarynda ornalasqan mundaı úılerdiń kópshiligi erterekte salynǵan. Osyǵan qaraı bıyl «Jol kartasy» baǵdarlamasynyń aıasynda 15-ten astam osyndaı qarttar úıi kúrdeli jóndeýden ótkizilgen. Sondyqtan bul baǵyttaǵy máseleler retimen sheshimin taýyp keledi», dedi G.Ábdihalyqova.
Oonyń pikirinshe, elimizdegi qarttar úıleri múmkindiginshe kishigirim, jınaqy bolǵany abzal. «Keńes odaǵy tusynda 600-ge jýyq adam turatyn záýlim ǵımarattardyń salynǵany esimizde. Búgingi tańda bul óte tıimsiz. Sondyqtan biz qarttar úıleriniń múmkindiginshe shaǵyn bolýyn qarastyrýymyz kerek. Qarttar nemese múgedekter ol mekemelerde óz úıinde júrgendeı sezinýleri kerek», dedi mınıstr.
