Eńbek mınıstrliginiń ótemaqy engizgeni týraly aqparat - jalǵan
ASTANA. KAZINFORM - Messendjerler men áleýmettik jelilerde QR Eńbek jáne halyqty áleýmettik qorǵaý mınıstrligi QQS úshin ótemaqy engizgeni týraly taratylyp jatqan aqparat shyndyqqa janaspaıdy.
«Messendjerlerde Eńbekmınniń QQS úshin ótemaqy tólemin engizgeni týraly shyndyqqa janaspaıtyn aqparat taratylýda. Taǵaıyndalǵan qarajatty aýdarý úshin belgisiz azamattar siltemege ótýdi usynady.
Áleýmettik kómektiń mundaı túri joq ekenin habarlaımyz. Tıisinshe, habarlamada kórsetilgen silteme alaıaqtar úshin azamattardyń jeke derekterin alý tásili bolýy múmkin. Alaıaqtarmen ózara árekettesýdi boldyrmaý úshin siltemege ótpeýge keńes beremiz», — dep jazdy vedomstvodan.
Memlekettik qoldaýdyń tıisti sharalary týraly resmı aqparat tek qana 1414 nómirinen SMS-habarlamalar arqyly taratylady.
