Eńbek zańyn buzǵan 15 qurylys nysanynyń jumysy toqtatyldy - Astana
ASTANA. QazAqparat - Aǵymdaǵy jyly jumysshylarynyń ómirine qaýip tóndirgen 15 qurylys nysanynyń materıaldary zań buzýshylyq faktisi boıynsha sotqa jiberildi.
Bul týraly Astana qalasy ákiminiń baspasóz qyzmeti Eńbek ınspektsııasy basqarmasyna silteme jasap habarlady.
Qurylystaǵy óndiristik jaraqattardyń negizgi sebebi qurylys alańyndaǵy jumys qarqynynyń asa joǵarylyǵy jáne kásibı táýekeldiń aldyn alý júıeleriniń joqtyǵy.
Bas merdigerler qurylys jumystaryn oryndaýda kóbine shaǵyn qurylys uıymdaryn kelisimshart negizinde jumysqa tartady. Osylaısha olar qaıǵyly jaǵdaı oryn alǵanda jaýapkershilikti moınyna almaıdy jáne áleýmettik máselelerdi sheshýden bas tartady.
2014 jyldyń birinshi onkúndiginde Astana qalasy Іshki ister basqarmasy memlekettik eńbek ınspektorlarynyń óndiriste oryn alǵan qaıǵyly oqıǵalar materıaldary boıynsha QR Qylmystyq kodeksiniń 152 babyna sáıkes 48 qylmystyq is qozǵady. Onyń ishinde 3 oqıǵa boıynsha kináli laýazymdy tulǵalardy qylmysyq jaýapkershilikke tartý úshin materıaldar sotqa jiberildi.
Eńbek ınspektsııasy basqarmasy alyn alý sharalaryna basa nazar aýdarady. Memlekettik ınspektorlar qala prokýratýrasy jáne QR qurylys kásipodaqtary tóraǵalarymen qurylys alańdaryn birlese aralaıdy. Osy ýaqytqa deıin eńbek ujymdarynda qaýipsizdik jáne eńbekti qorǵaý zańdylyqtaryn túsindirý boıynsha óndiristik jaraqatty azaıtýǵa baǵyttalǵan 110 kezdesý uıymdastyryldy.
