Eńbek zańnamasyn reformalap, eńbek daýlary men janjaldaryn sheshetin táýelsiz ınstıtýt qurý qajet - depýtat S. Sársenov
ASTANA. 31 mamyr. QazAqparat - Elimizdegi eńbek zańnamasy reformany qajet etedi. Sonymen qatar, eńbek daýlary men janjaldaryn sheshetin táýelsiz ınstıtýt qurý qajet.
Búgin Májilistiń jalpy otyrysynda Úkimet basshysynyń atyna saýal joldaǵan depýtat Saǵııatýlla Sársenov osylaı málim etti.
«Sońǵy kezderi elimizdiń jer-jerinde oryn alǵan áleýmettik-eńbek daýlarynyń saldary qazaqstandyq qoǵamdy dúr silkindirip, kópshilikti oıǵa qaldyrdy. Mundaǵy eń negizgi másele, bizdiń elimizde búginge deıin áleýmettik-eńbek daýlarynyń týyndaýy jaıynda bir júıege keltirilgen zertteýler bolmaýyna kelip tireledi. Al, bul áleýmettik daýlardyń qaıda, qalaı jáne qashan týyndaýy múmkin ekendigi jóninde naqty málimet alýǵa kedergi. Sol sebepten eń birinshi kezekte óte joǵary deńgeıde eńbek-áleýmettik qatynastar máselesi boıynsha búkilqazaqstandyq keshendi zertteýlerin júrgizý qajettigi zaman talaby», - deıdi Saǵııatýlla Sársenov.
Onyń paıymynsha, Eńbek Kodeksi boıynsha ujymdyq kelisim shart jasaýǵa múmkin bolsa da, birde-bir jumys berýshi is júzinde qatardaǵy jumysshylarmen kelisim sharttyń bul túrin jasamaıdy. Sondyqtan, eńbek daýynda búkil ujymnyń múddesi jatsa da, zań boıynsha jekelegen adamnyń máselesi retinde ǵana qarastyrylyp otyr.
«Eń mańyzdysy, Qazaqstannyń eńbek týraly zańnamasy reformany qajet etedi. Eńbek daýlary men janjaldaryn sheshetin táýelsiz ınstıtýt qurý qajet. Bul máselege basa nazar aýdaratyn kez jetti! Ol úshin álemdik, ásirese, eýropalyq, soltústik amerıkalyqtardyń tájirıbesine nege súıenbeske», - degen S. Sársenbaev, birqatar eýropa memleketterindegi tájirıbeni alǵa tartty. Máselen, eýropa elderiniń basym kópshiliginde eńbek daýyn sheshýmen aınalysatyn memlekettik deńgeıde arnaıy komıssııalar qurylǵan. Ulybrıtanııada keńes berý qyzmeti, Irlandııada eńbek qatynastary jónindegi komıssııa, al Fınlıandııada álemdik deldaldardyń Ulttyq bıýrosy qyzmet etedi.
«Atalmysh mysaldardyń Qazaqstanda da júzege asyrylýyna tolyq negiz bar. Sebebi búgingi tańda memleketimiz áleýmettik-ekonomıkalyq damý deńgeıi boıynsha aldyńǵy qatarly damyǵan elder qataryna endi. Endeshe, eńbek qatynastary jóninde de biz aldyńǵy qatarly elder dárejesinde bolýymyz qajet», - deıdi depýtat.
