Eńbek vıtse-mınıstri jumyspen qamtý ortalyqtaryna senim nege tómendegenin túsindirdi
ASTANA. QazAqparat - Jumyspen qamtý ortalyqtarynyń qyzmetin qaıta qaraý eskerilip otyr. Bul týraly Májiliste «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýy jáne kóshi-qony máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda QR Eńbek jáne halyqty áleýmettik qorǵaý vıtse-mınıstri Birjan Nurymbetov málim etti, dep habarlaıdy QazAqparat.
«Elimizde 199 memlekettik jumyspen qamtý ortalyqtary bar, ıaǵnı ár oblysta jáne aýdan deńgeıine deıin. Biraq búgingi tańda sol jumyspen qamtý ortalyqtarynyń jumysyna zaman talaptaryna saı ózgerister engizý qajet bolyp tur. Osyǵan qatysty tıisti ózgeristerdi qarastyryp otyrmyz. Birinshiden, atalǵan ortalyqtar memlekettik mekeme bolyp tabylady jáne olardyń qyzmeti tikeleı jergilikti bıýdjetten shyǵystar smetasy boıynsha qarjylandyrylady. Basqasha aıtqanda, bul ortalyqtardyń qyzmetkerleri ózderiniń eńbekaqysyn kepildi túrde qol jetkizilgen nátıjege qaramastan alyp keledi. Moıyndaýymyz kerek, osyǵan baılanysty ókinishke qaraı, jumyspen qamtý ortalyqtarynyń is júzinde halyqqa qyzmet kórsetip, jumysqa ornalastyrýǵa qaraǵanda, bólingen qarajatty ıgerýmen asyra aınalysyp jatady», - dedi Birjan Nurymbetov.
Onyń sózine qaraǵanda, qazirgi jumyspen qamtý ortalyqtary ótinish berý qaǵıdatymen qyzmet isteıdi. Ol degenimiz, sol ortalyqqa azamat kelgen kezde ǵana qyzmet kórsetiledi. Sondyqtan bul mekemelerdiń jumysy qaıta qaralyp jatyr.
«Búginde zań boıynsha jumys berýshiler óziniń bos qyzmet oryndary týraly málimetti jumyspen qamtý ortalyǵyna ótkizýge mindetti. Ony jumys berýshiler oryndap jatyr. Mysaly, byltyr búkil Qazaqstan boıynsha jumys berýshiler 544 464 bos jumys ornyn usyndy. Biraq sol vakansııa týraly málimetter jumyspen qamtý ortalyǵynyń aqparatynda ǵana qalyp otyr. Ol tek atalǵan ortalyqqa kelgen azamatqa qoljetimdi. Al óz kezeginde jumys berýshi sol berip otyrǵan bos orynǵa qaıtarym kórip otyrǵan joq, oǵan eshkim de kadrdy iriktep jatqan joq. Árıne, osyǵan baılanysty jumys berýshi tarapynan jumyspen qamtý ortalyqtaryna senim deńgeıi óte tómen», - deıdi ol.
Sondyqtan osy sebepterdi eskere otyryp, jumyspen qamtý ortalyqtary memlekettik mekeme dárejesinen sharýashylyq júrgizý quqyǵyndaǵy nysanǵa aýystyrylmaq. «Ol degenimiz, ortalyqtar tikeleı bıýdjetten qarjylandyrylmaıdy, ıaǵnı olar memlekettiń tapsyrysyn oryndaıdy. Bul turǵyda biz ár jumyspen qamtý ortalyǵyna ındıkatorlar belgileımiz, qol jetkizetin kórsetkishter eskeriledi. Onyń basymdyǵy turaqty qyzmetke ornalastyrýǵa baǵyttalady. Olardyń barlyǵyna jańa standarttar ázirleımiz, osy oraıda qyzmet kórsetý jaǵdaıy, elektrondy kezek jáne basqa da talaptary qamtylady. Biz zańdy kútpeı, qazir Astana, Almaty jáne Pavlodar qalalarynda jańa standarttar boıynsha jumyspen qamtý ortalyqtarynyń qyzmetin bastap kettik»,- dep túsindirdi vıtse-mınıstr.
Budan bólek ol jumyspen qamtýdyń jekeshe agenttikteriniń qatynastaryn birlese otyryp keńeıtý kózdelip otyrǵandyǵyn sóz etti. Búginde elimizde belsendi qyzmet kórsetip jatqan 46 jekeshe agenttikter bar.
«Biz kelesi jyldan bastap jekeshe agenttikterdi osy jumysqa tartýdy kózdep otyrmyz. Atap aıtqanda, biz olarǵa tapsyrys beremiz, ıaǵnı esepte turǵan jumyssyzdardy qyzmetke ornalastyrý týraly»,-dedi Nurymbetov
