Eńbek vıtse-mınıstri qashyqtan jumys isteýdiń tártipteri týraly aıtty

NUR-SULTAN. QazAqparat – QR Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov TMD elderiniń konsýltatıvtik keńesiniń otyrysynda qashyqtan jumys isteýdi retteý tártipteri týraly aıtty, dep habarlaıdy QazAqparat.

Aqmádı Sarbasov jumys berýshiler men kadr qyzmetiniń, onyń ishinde memlekettik organdardyń ókilderi qyzmetkerlerdiń qashyqtan jumys isteý formatyna májbúrli aýysýyna baılanysty, ásirese eńbek zańnamasynyń jetildirilmeýi boıynsha kezdesken birqatar qıyndyqtar týraly aıtyp berdi.

«QR Eńbek kodeksine bıyl qashyqtan jumys isteýge baılanysty eńbek qatynastaryn retteý máseleleri boıynsha túzetýler qabyldandy. Sonymen, qashyqtan jumys isteýdiń jańa rejımderi paıda boldy, olar taraptardyń kelisimi boıynsha turaqty, ýaqytsha nemese aralas bolyp ornatylady. Budan basqa, jumys berýshi jumystyń oryndalýyn naqty ýaqytpen tirkeı almaıtyn jaǵdaılarda jumys ýaqytyn esepke alý boıynsha, sondaı-aq qyzmetker jumys berýshimen ózara is-qımyl jasaý úshin baılanysta bolýǵa tıis ýaqytty eńbek shartynda esepke alý boıynsha QR Eńbek kodeksiniń normalary naqtylandy. Qyzmettik mindetterin júzege asyratyn, eńbegi arnaıy zańdarmen retteletin qyzmetkerler úshin qashyqtan jumys isteý tártibi men merzimderin retteýge qatysty normalar kózdelgen», – dedi Aqmádı Sarbasov.

Vıtse-mınıstr jumys berýshimen qashyqtan jumys isteý formatyna qaramastan, eńbek zańnamasynyń talaptaryn qamtamasyz etý, onyń ishinde qyzmetkerdiń eńbek qaýipsizdigi jáne eńbekti qorǵaý máseleleri boıynsha jaýapkershiligi alynbaıtynyn atap ótti.

«Sonymen qatar, qaýipsiz eńbek jaǵdaılary salasyndaǵy sońǵy ózgerister aıasynda qashyqtan jumys isteıtin qyzmetkerlerdiń eńbek qaýipsizdigi jáne eńbekti qorǵaý, sondaı-aq eńbek mindetterin qaýipsiz oryndaýdy qamtamasyz etý jónindegi talaptardy saqtaýy tártibi jumys berýshiniń aktisinde aıqyndalady. Budan basqa, jumys berýshiniń eńbek qaýipsizdigi jáne eńbekti qorǵaý máseleleri boıynsha mindetteri mindetti jáne taraptardyń kelisimi boıynsha ,jumys ereksheligin eskere otyryp sheshiletin mindetter dep bólingen», – dedi ol.

Aıta keteıik, búgin onlaın rejımde TMD-ǵa qatysýshy memleketterdiń Eńbek, jumyspen qamtý jáne halyqty áleýmettik qorǵaý jónindegi konsýltatıvtik keńesiniń XXXIV otyrysy ótti.