Eńbek ujymdaryndaǵy ereýilderdi retteıtin zańnama ázirleý tapsyryldy

NUR-SULTAN. QazAqparat –QR Premer-Mınıstriniń orynbasary Eraly Toǵjanov eńbek ujymyndaǵy ereýilderdi retteıtin zańnamalyq baza ázirleýdi tapsyrdy, dep habarlaıdy QazAqparat tilshisi.

«Eńbek ujymdarynda sanktsııa berilmegen ereýilder men sherýlerdiń beleń alǵanyn eskersek, jumysshylardyń talaptaryn aıtý protsedýralaryn zańnama aıasynda ońtaılandyrý kerek. Eńbek daýlary týyndaǵan jaǵdaıda ony sheshýdiń naqty zańnamalyq úlgileri aıqyndalýy qajet. Mundaı shara eńbek daýlaryn quqyq aıasynda sheshýge múmkindik beredi», - dedi Eraly Toǵjanov Eńbek jáne halyqty áleýmettik qorǵaý mınıstrliginiń keńeıtilgen alqa májilisinde.

Sondaı-aq, vıtse-premer syrtqy kóshi-qon protsesin aımaqtardyń jumyspen qamtý áleýetin eskere otyryp retteıtin usynys daıyndaýdy tapsyrdy.

«Syrtqy kóshi-qon boıynsha naqty sheshimder qabyldaıtyn ýaqyt keldi. Onyń ishinde Túrkistan, Mańǵystaý oblystaryna baılanysty másele bar. Mańǵystaýǵa adamdar ábden qonystanyp bolǵannan keıin, endi basqa óńirlerge tarataıyq degen suraqtar týyndap jatady. Syrttan kelgen azamattardy birden naqty óńirlerge baǵyttaý kerek. Ol boıynsha sizderden naqty usynystar kútemiz», - dedi Úkimet basshysynyń orynbasary.