Eńbek shartynda qandaı talaptar mindetti túrde kórsetilýi kerek
ASTANA. KAZINFORM — Eńbek sharty jumysqa kirispes buryn taraptardyń quqyqtary men mindetterin aıqyndaıtyn negizgi qujat sanalady. Ony rásimdeý kezinde qandaı talaptarǵa nazar aýdarý qajet? Bul týraly Eńbek jáne halyqty áleýmettik qorǵaý mınıstrligi Memlekettik eńbek ınspektsııasy komıtetiniń Astana qalasy boıynsha departamentiniń basshysynyń orynbasary Murat Shákenov túsindirdi.
Onyń aıtýynsha, Qazaqstan Respýblıkasy Eńbek kodeksiniń 21-babyna sáıkes, zańnamada ózgeshe kózdelmese, eńbek qatynastary eńbek sharty negizinde týyndaıdy.
— Al qujattyń mazmunyna qoıylatyn talaptar Eńbek kodeksiniń 28-babynda belgilengen. Onda qyzmetkerdiń atqaratyn jumysy men laýazymy, jumys orny, sharttyń merzimi jáne jumysqa kirisetin kúni kórsetilýi tıis. Sonymen qatar jumys jáne tynyǵý ýaqytynyń rejımi, eńbekaqy mólsheri men ony tóleý tártibi de aldyn ala jazylady. Bul qyzmetkerge jumysqa kirispeı turyp eńbek jaǵdaıymen tanysýǵa múmkindik beredi, — dedi vedomstvo ókili.
Budan bólek Murat Shákenov eńbek shartynda qyzmetkerdiń zańmen bekitilgen quqyqtaryn shekteıtin talaptar bolmaýǵa tıis ekenin atap ótti. Eńbek kodeksiniń 10-babyna sáıkes, shartta qyzmetkerdiń jaǵdaıyn eńbek zańnamasynda belgilengen deńgeıden tómendetetin erejeler qarastyrylmaýy kerek.
Al zııandy jáne qaýipti eńbek jaǵdaıynda jumys isteıtin azamattarǵa zańnamada kózdelgen kepildikter men ótemaqylar beriledi.
Aıta keteıik, buǵan deıin jumystan tys ýaqytta eńbek etken qyzmetkerge qansha aqy tólenetini jóninde jazdyq.
