Eńbek shartyn tirkeýge qatysty jańa talaptar men jaýapkershilik engiziledi
ASTANA. KAZINFORM — QR Eńbek jáne halyqty áleýmettik qorǵaý mınıstrligi qazaqstandyq jumys berýshilerge Eńbek sharttaryn esepke alýdyń biryńǵaı júıesine derekterdi engizý qaǵıdalaryn qatań saqtaý qajettigin eske salady. 2026 jylǵy naýryzdan bastap kadrlyq eseptiń ashyqtyǵyn arttyrýǵa jáne eńbek qatynastary salasyndaǵy tártipti kúsheıtýge baǵyttalǵan zańnamalyq túzetýler kúshine enedi. Bul týraly vedomstvonyń baspasóz qyzmeti málim etti.
Qazaqstan Respýblıkasynyń Ákimshilik quqyq buzýshylyq týraly kodeksiniń jańa normalary jumystyń tsıfrlyq formatyn elemegeni úshin jaýapkershilikti kózdeıdi. Kodekstiń 98-babyna sáıkes eńbek sharttaryn jasasý jáne toqtatý, sondaı-aq olarǵa kez kelgen ózgerister men tolyqtyrýlar engizý týraly málimetterdi engizý tártibi men merzimderin buzǵany úshin ákimshilik jaýapkershilik belgilengen. Jańartylǵan retteý jaǵdaıynda aqparatty ýaqtyly tirkeý aıyppul sanktsııalaryn qoldaný táýekelderin barynsha azaıtýdyń basty quralyna aınalady.
— Bıznestiń jańa talaptarǵa qolaıly beıimdelýi úshin vedomstvo HR Enbek eńbek resýrstary portalynyń proaktıvti fýnktsıonalyn paıdalanýdy usynady. Platforma buzýshylyqtardyń aldyn alatyndaı etip ázirlengen. Júıe dálsizdikterdi avtomatty túrde anyqtaıdy jáne jumys berýshiniń jeke kabınetine naqty jumyskerler boıynsha alshaqtyqtardyń bar ekendigi týraly habarlamalar jiberedi. Bul tetik derekterdi jedel salystyryp tekserý jáne kadrlyq esepti zańnamaǵa sáıkes keltirý úshin sıgnal bolyp tabylady, — delingen habarlamada.
Buǵan qosa Portalda «Jumyskerler» bóliminde «Jumyskerler boıynsha alshaqtyqtar» ınteraktıvti monıtorıng taqtasy iske qosyldy. Taqtanyń derekqor bazasy aı saıynǵy negizde qalyptastyrylady jáne jumys berýshilerge naqty ýaqyt rejıminde eńbek sharttary boıynsha málimetterdiń durystyǵyn men mindetti zeınetaqy jarnalary aýdarymdarynyń tolyqtyǵyn baqylaýǵa múmkindik beredi.
Mınıstrlik kásiporyndardyń basshylary men kadr qyzmetterine tsıfrlyq eseptiń ózektiligin aldyn ala tekserýdi jáne túzetýler zańdy kúshine engenge deıin onyń zań talaptaryna tolyq sáıkestigin qamtamasyz etýdi qatań usynady.
Aıta keteıik, jumystan shyǵyp qalǵanda 45%-ǵa deıingi tólem qalaı taǵaıyndalatynyn jazǵan edik.
