Eńbek sharty jasalǵannan keıin onyń talaptaryn ózgertýge bola ma
ASTANA. KAZINFORM – Jumys berýshi eńbek sharty jasalǵannan keıin onyń talaptaryn qyzmetkerdiń kelisiminsiz ózgerte almaıdy. Eńbek shartyna engiziletin ózgerister taraptardyń kelisimimen rásimdeledi. Bul týraly Astana qalasy boıynsha QR Eńbek jáne halyqty áleýmettik qorǵaý mınıstrligi Memlekettik eńbek ınspektsııasy komıteti departamenti basshysynyń orynbasary Murat Shákenov málimdedi.
Elordada ótken baspasóz konferentsııasynda spıkerden eńbek sharty jasalǵannan keıin onyń talaptaryn ózgertýge bola ma degen suraq qoıyldy.
– Iá, eńbek shartynyń talaptary qyzmetkermen kelisý arqyly ózgertilýi múmkin. Eńbek shartyna engiziletin ózgerister qosymsha kelisimde kórsetiledi. Qosymsha kelisim eńbek shartynyń ajyramas bóligi bolyp sanalady, – dedi Murat Shákenov.
Onyń aıtýynsha, qosymsha kelisimde qyzmetkerdiń jalaqysynyń ósýi nemese jumys ýaqyty rejıminiń ózgerýi sekildi jańa talaptar jazylýy múmkin.
Osylaısha, eńbek qatynastary barysynda bastapqy eńbek shartyndaǵy talaptardy ózgertý qajettiligi týyndasa, tıisti ózgerister taraptardyń kelisimi negizinde qosymsha kelisim arqyly rásimdeledi.
Aıta keteıik, buǵan deıin Eńbek mınıstrligi jumysqa ornalasý jáne bos jumys oryndaryn jarııalaý tártibin túsindirgen edi.
