Eńbek salasyndaǵy kemsitýshilik úshin jumys berýshiler jaýapkershilikke tartylady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine eńbek máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

«Qazirgi ýaqytta teń eńbek jaǵdaılaryn qamtamasyz etpeý boıynsha kemsitý faktilerine jol bergeni úshin ákimshilik jaýapkershilik zańnama túrinde joq. Sol sebepten jumyskerlerdiń quqyqtary osy jaǵynan tolyqtaı qorǵalmaı otyr. Osyǵan baılanysty zań jobasynda jumyskerdiń laıyqty eńbek jáne turmys jaǵdaılaryna quqyǵyn belgileý jáne ákimshilik zańnamaǵa teń eńbek jaǵdaılary boıynsha kemsitý faktilerine jol bergeni úshin jumys berýshilerdi jaýapkershilikke tartýǵa negizdeme engizýge usynylady», - dedi QR Eńbek jáne halyqty áleýmettik qorǵaý mınıstri Birjan Nurymbetov.

Budan basqa, qoldanystaǵy Eńbek kodeksi boıynsha jumyskerdiń áskerge shaqyrylýy eńbek shartyn toqtatýǵa negiz bolady. Osyǵan baılanysty merzimdi áskerı boryshyn ótep júrgen azamattyń jumys ornyn saqtaý, sondaı-aq olarǵa jalaqysy saqtalmaıtyn demalys berý boıynsha jumys berýshiniń mindetterin bekitý usynylady. Bul rette jumyskerdiń áskerden qaıtyp kelgennen keıin bir aıdyń ishinde óz jumysyna kirisý mindeti de bekitilip otyr.

Budan buryn habarlanǵandaı, zań jobasy eńbek qatynastaryn, áleýmettik seriktestikti, qaýipsizdik jáne eńbekti qorǵaý máselelerin retteýge baǵyttalǵan.

«Zań jobasyndaǵy eńbek qatynastaryn retteý salasyna qatysty negizgi ózgeristerge toqtalsaq, eńbek sharttaryn jasasý jáne esepke alý protsesin avtomattandyrý maqsatynda «eńbek shartyn esepke alýdyń biryńǵaı júıesi» degen uǵym engizilip otyr. Atalǵan shara jumyskerlerdiń eńbek ótilin, biliktiligin, jumys ornyn rastaý tártibin jeńildetýge, jumysker týraly rastalǵan aqparat alýǵa jáne saqtalýyn qamtamasyz etýge múmkindik beredi.