Eńbek salasyndaǵy harassment jańa deńgeıde qaralady
ASTANA. KAZINFORM – Jumys ornyndaǵy harassment máselesi elimizde jańa deńgeıde qarastyrylýy múmkin. Eńbek mınıstrligi arnaıy túzetýler ázirlep jatyr. Bul týraly Eńbek quqyǵy salasynyń sarapshysy Bıbigúl Aǵybaeva «JibekJoly» arnasyndaǵy «BúginLive» baǵdarlamasyna bergen suhbatynda aıtty.
Usynysqa sáıkes mundaı jaǵdaıǵa tap bolǵan qyzmetker shaǵymdy jasyryn túrde bere alady. Al, aıyptalýshy qyzmetker ótirik anyqtaıtyn qurylǵy arqyly tekserilýi múmkin. Eger kinási dáleldense, jumystan bosatylý qaýpi bar.
Mınıstrliktiń málimetinde jeke qylmystyq nemese ákimshilik bap engizilmeıdi. Alaıda harassment zorlaý, kúsh qoldaný nemese kámeletke tolmaǵandarǵa qatysty áreketke ulasqan bolsa, qylmystyq is retinde qaralyp, aýyr jaza qoldanylady. Bul bastama jumys ornyn qaýipsiz etýge baǵyttalǵan. Biraq qoǵamda san túrli pikir týǵyzyp otyr.
– Jalpy, qazir eńbek kodeksinde harassment máselesi kózdelmegen. Sonymen qatar búginde etıkalyq kodekske sáıkes, jumyskerdi tártiptik jaýapkershilikke tartý múmkindigi ǵana bar. Biraq, harrasment dep kúdikke ilingen adam óziniń kinásizdigin dáleldeýge quqyǵy bar, árıne. Al ekinshi tarap, shynymen osy áreketter jasaldy ma, joq pa, sony dáleldeýi tıis. Dálelsiz qandaı da bir adamdy aıyptaý, ıa bolmasa bireýdi laýazymynan alyp tastaý maqsatynda jala jabatyn oqıǵalar kezdesip jatady. Eger zańnamaǵa ózgeris engiziletin bolsa, onyń jaqsy ári kóńilge qonbaıtyn tusy da bar. Jaǵymdy jaǵy: zań júıeli jumys istese osyndaı kıkiljińderdi retke keltiretin edik, - deıdi Bıbigúl Aǵybaeva.
Al ótirik anyqtaıtyn qurylǵynyń nátıjesi eńbek shartyn buzýǵa 100% paıyz negiz bola almaıdy. Muny dálel retinde sotta qoldaný úlken másele. Sebebi buny áli de tolyqtaı zertteý kerek.
– Tájirıbede qurylǵyny da aldap ketetin adamdar bolýy múmkin. Men bul ózgertýlerdi tolyq oqyp shyqtym. Ol jerde eger de jumys ornynda bir adam ekinshi adamǵa qandaı da bir qysymshylyq jasaıtyn bolsa, jumys berýshi jumys ornynda tekseris júrgizip, sol tekseris nátıjesi negizinde adamnyń kinási dáleldenetin jaǵdaıda ǵana jumys berýshi óziniń bastamasy boıynsha, eńbek shartyn toqtatýǵa quqyǵy bolady dep josparlanǵan. Meniń oıymsha bul durys, – dedi Eńbek quqyǵy salasynyń sarapshysy.
Sarapshynyń pikirinshe, zańnamany ózgertý, talaptardy qatańdatý keleńsizdikke tap bolǵan adamnyń mundaı áreketti ekinshi ret qaıtalamaýyna septigin tıgizedi. Sondyqtan zańdy jetildirip qana qoımaı, ony túsindirý jumystaryn kóptep júrgizý kerek.
Eske salaıyq, buǵan deıin QR ІІM Harassmenttiń aldyn alatyn zań jobasy ázirlep jatqany týraly jazǵan bolatynbyz.