Eńbek rejımin saqtap, kóńildi júrý kerek - Qazaqstannyń úzdik dárigeri keńes berdi
NUR-SULTAN. QazAqparat - Elordada 2019 jyldyń úzdik dárigeri anyqtaldy, dep habarlaıdy QazAqparat tilshisi.
Bul júldeni Pavlodar oblystyq onkologııalyq dıspanseriniń onkolog-hırýrgi Telman Álǵojın jeńip aldy.
«Meniń eńbek ótilim bıyl 23 jyl bolady. 1996 jyly ınstıtýt bitirisimen Pavlodar oblystyq onkologııalyq dıspanserine keldim. Sol orynda taban aýdarmaı 20 jyldan astam ýaqyt eńbek etip kelemin. Onda ókpege torokaldy ota jasaýmen aınalysamyn. Qazir bas dárigerdiń orynbasary qyzmetin de atqaramyn. Baıqaýda óńirlik dárigerlerge kóńil bólingeni qýantady. Bul - meniń ǵana emes, tutas ujymnyń jetistigi. Elimizde bul marapatqa laıyq áriptesterimniń kóp ekenine senimdimin», - dedi Telman Álǵojın tilshilerge bergen suhbatynda.
Sonymen birge, dáriger óz óńirindegi onkologııalyq jaǵdaı jóninde baıandap berdi.
«Pavlodar - onkologııalyq aýrýlar jıi kezdesetin óńirler qatarynda. Munda ónerkásiptik ynsandar kóp. Halyqtyń demografııalyq quramy da eleýli yqpal etedi. Elimizdiń ońtústik óńirlerinde halyqtyń ortasha jasy 32 bolsa, bizdiń óńirde anaǵurlym joǵary. Adamnyń jasy - onkologııalyq aýrýlardyń basty faktorlarynyń biri. «Adam ajalsyz bolsa da, kúnderdiń kúninde qaterli isikke ushyraıdy» degen sóz bar. Óıtkeni, bizdiń jasýshamyz kúndelikti jańaryp otyrady, jańa jasýshalar ósedi. Sol sátte aqaý týyndasa, jasýshalar durys óspeı, aýrý paıda bolady», - dedi ol.
Dárigerdiń aıtýynsha, qaterli isikti boldyrmaý úshin onyń aldyn alǵan jón.
«Dúnıejúzilik densaýlyq saqtaý uıymynyń aıtýynsha, búginde adam densaýlyǵyna áser etetin faktorlardyń 50% - áleýmettik-turmystyq, 20% - muragerlik, 20% - ekologııalyq jáne 10% ǵana medıtsına ekeni dáleldengen. Eń úlken bólikti quraıtyn áleýmettik-tumystyq faktorlarǵa ómir salty, zııandy ádetter, eńbek pen demalys rejımi, psıhologııalyq-emotsııalyq kóńil-kúı enedi. Sondyqtan, eńbek rejımin ustanyp, kúızelis shaqyratyn jaǵdaılardan saqtanǵan adam onkologııanyń damý qaýpin 20-30 paıyzǵa azaıta alady», - dep keńes berdi T. Álǵojın.
Aıta keteıik, Elordada «Densaýlyq saqtaý júıesiniń úzdikteri» respýblıkalyq baıqaýynyń jeńimpazdary marapattaldy. Saltanatty shara maýsym aıynyń úshinshi jeksenbisinde atalyp ótetin Medıtsına qyzmetkerleri kúni qarsańynda uıymdastyrylǵan. Onda myńnan astam otandyq mamandar baıqaýdyń 16 atalymy boıynsha qujat tapsyrǵan.
