Eńbek resýrstaryna degen suranystyń kóbeıýi óndiris kóleminiń ulǵaıýmen ǵana emes, tıimsiz jumyspen qamtýdyń da oryn alýymen baılanysty bolyp otyr
«Sońǵy ýaqytta elimizde ekonomıkalyq belsendiliktiń turaqty ósý úrdisi anyq baıqalady. Máselen, aǵymdaǵy jylǵy qazannyń 1‑inde jumyspen qamtylǵan halyqtyń sany 8 mln. 163 myń adamnan asty. Salystyrmaly túrde qarasaq, 2005 jyly - 7 mln. 260,9 myń, 2008 jyly - 7 mln. 832,1 myń adamdy quraǵan bolatyn. Jumyssyzdyq deńgeıi de turaqty túrde tómendep keledi. Mysaly, 2005 jylǵy bul kórsetkish 8,1 paıyz bolsa, 2008 jyly 6,6 paıyzǵa, al aǵymdaǵy jyldyń qyrkúıeginde - 5,6 paıyzǵa deıin azaıǵan. Osy kezeń ishinde jumyssyzdardyń qatary 140 myńnan astam adamǵa tómendedi», dedi mınıstr.
Degenmen, mınıstrdiń aıtýynsha, eńbek resýrstaryna degen suranystyń kóbeıýi óndiris kóleminiń ulǵaıýmen ǵana emes, tıimsiz jumyspen qamtýdyń da oryn alýymen jáne biliktiligi joq arzan eńbek kúshin paıdalaný múmkindikterimen de baılanysty bolyp otyr. Máselen, búgingi kúni jumyspen qamtylǵandardyń shamamen úshten biriniń ǵana jalpy orta bilimi bar kórinedi. Onyń ústine, azamattardy kásiptik daıarlaýdyń aýqymy, qurylymy men nysandary kásiptik bólinis turǵysynan alǵanda jumys kúshine degen suranystyń da ózgerýine sáıkes kelmeı otyr.
«Tıimsiz jumyspen qamtýdyń jáne bir kórinisi, ózin ózi jumyspen qamtyǵan halyqtyń úles salmaǵynyń joǵary bolýy ári onyń qurylymynyń da aıryqshalylyǵy bolyp tabylady. Elimizde jumyspen qamtýdyń óńirlik saralanýy ájeptáýir oryn alyp otyr jáne halyqtyń shyn máninde basqarýǵa kelmeıtin ishki kóshi-qony men adamdardyń eńbek utqyrlyǵynyń tómendigi de bul jaǵdaıdy qıyndata túsýde. Sheshilmegen problemalardyń oryn alýy, eńbek naryǵy men eńbek resýrstarynyń sapasyna Údemeli ındýstrııalyq jáne ınnovatsııalyq damý baǵdarlamasy qoıyp otyrǵan jańa talaptar eńbek naryǵy men jumyspen qamtý salasyndaǵy memlekettik saıasatty jańartýdy kezek kúttirmeıtin máselege aınaldyrdy», - dedi G. Ábdihalyqova.
