Eńbek ótili –158 jyl: Qyzylordada polıtseıler áýleti turady
QYZYLORDA. KAZINFORM – Qyzylorda qalasynda jergilikti jurtshylyq Muhtarovtardy polıtseıler dınastııasy dep sanaıdy. Bul áýlettiń jalpy eńbek ótili 158 jyldy quraıdy.
Áýlette alǵash polıtsııa qyzmetinde bolǵan atalary Abdýlla Muhtarov. Quqyq qorǵaý salasynyń jaýapty mindetin abyroıly atqara bilgen ardaqty azamattyń balalary jastaıynan saqshy qyzmetiniń qyr-syryn bilip ósti. 1967 jyly ishki ister salasyndaǵy qyzmetin leıtenant shenimen bastaǵan A.Muhtarov eseli eńbeginiń arqasynda oblystyq dárejedegi basshylyq qyzmetterge deıin kóterildi. Ómiriniń 28 jylyn quqyq qorǵaý qyzmetine arnap, 1989 jyly podpolkovnık shenimen qurmetti demalysqa shyqty. Al onyń úsh birdeı uly tártip saqshysynyń qyzmetin ómirlik joly retinde tańdap, quqyq qorǵaý organdarynda nátıjeli eńbek etip, zeınetkerlikke shyqqan.
Ol kisiniń balasy Ábdyqalyq Abdýllauly QR Іshki ister organynyń qylmystyq izdestirý salasynda qyzmet atqardy. Podpolkovnık shenimen qurmetti eńbek demalysyna shyqty. Óziniń balalary jóninde aǵamyz «Tórt balamyzǵa zaıybym Aıgúl Ámirbekqyzymen birge tálim-tárbıe berip, eliniń naǵyz patrıoty etip tárbıeledik. Polıtseı adal, ádepti jáne jaqsy maman bolýy kerek. Óz jumysyn tııanaqty oryndaý úshin ony jaqsy kórgeni jón. Otbasy - basty qundylyq. Qıyn jáne qaýipti jumys bizdiń otbasymyzdaǵy qarym-qatynasymyzǵa teris áser etpeıdi. Kerisinshe, polıtsııa qyzmeti bizdiń otbasymyzdaǵy baılanysty nyǵaıta túsýde», - deıdi.
Búginde Qyzylorda qalalyq Polıtsııa basqarmasynyń abyroıly qyzmet atqaryp júrgen Jasulan Ábdyqalyquly Abdýlla - bul áýlette polıtsııa salasynda eńbek etip júrgen úshinshi býyn. Jasulan Qyzylorda qalalyq Polıtsııa basqarmasynyń tergeý bóliminiń aǵa tergeýshisi qyzmetin atqarady, polıtsııa aǵa leıtenanty. Óziniń kásibıligimen jáne qyzmettik mindetterine jaýapkershilikpen qaraýymen erekshelendi. Ol kóptegen áriptesine úlgi bola bildi. Jasulan qyzmette óte jaýapty jáne óziniń aldyna qoıǵan maqsatyna umtylǵan, minezi qaıyrymdy, árqashan áriptesterine qandaı da bir máselelerde kómektesýge ázir turady.
Jasulan bala kezinen bastap atasy men ákesiniń ár kezde polıtsııa qyzmetkeri formasynda kórip ósken. Ol úshin ákesi úlken úlgi boldy. Onyń kózinde polıtsııa árqashan qorǵan bolyp turdy.
«Men árqashan atam men ákemdi maqtan tutamyn. Polıtsııa – bul óte qıyn jáne kúrdeli mamandyq, óıtkeni adamdar únemi óz ómirin adamdar úshin táýekel etedi. Ákem árdaıym jumysta bolatyn, ony otbasylyq dastarhan basynan jıi kóre bermeısiń», – dedi Jasulan.
