Eńbek ótili az ǵylym kandıdatyn basshylyqqa taǵaıyndaǵan sheneýnikter jazalandy
QR Memlekettik qyzmet isteri jáne sybaılas jemqorlyqqa qarsy kúres is-qımyl agenttiginiń oblystyq Ádep jónindegi keńesi kezekten tys otyrys ótkizdi. Onda Alǵa aýdany ákiminiń orynbasary Ánýarbek Qonjar, aýdan ákimi apparatynyń memlekettik-quqyqtyq jáne qarjylyq jumystar bóliminiń basshysy Baýyrjan Dosymov jáne aýdandyq jer qatynastar bóliminiń basshysy Eskendir Bekishke qatysty tártiptik is qaraldy. Sebebi, aýdandyq aýyl sharýashylyǵy bóliminiń basshysy Qaırat Mýsın jańa qyzmetke zańsyz taǵaıyndalǵan. 2017 jyldyń 3 shildesi kúni baıqaý jarııalanyp, bir ǵana úmitker tirkelgen jáne onyń basshylyq qyzmet atqarýǵa 10 aılyq eńbek ótili jetpegen. Al komıssııa quramynda bolǵan sheneýnikter aldyna kelgen úmitkerdiń eńbek ótili týraly aqparatty qaramaı, suraqqa jaýap alǵandaryn ǵana aıtty.
«Biz komıssııa qurymynda bolǵanda úmitkerge suraq qoıyp, oǵan naqty jaýap alǵan edik. Al úmitkerdiń eńbek ótilin qarap, tekseretin kadr jónindegi bólim boldy. Sebebi, buǵan deıin Qaırat Mýsın aýmaqtyq aýyl sharýashylyǵy ınspektsııasyn basqardy. Basshylyq qyzmetti atqarǵan soń onyń eńbek ótiline kúmán bolmaı, tekserý júrgizbedik. Ári ol joǵary bilimdi, veterınarııa ǵylymdarynyń kandıdaty», - dedi aýdan ákiminiń orynbasary Ánýarbek Qonjar.
Aıta keteıik, Ádep keńesi komıssııa quramynda bolǵan úsh sheneýnikti qyzmetine tolyq saı emes dep eskertý berdi. Eger sheneýnikter alty aıda qaıta qatelik jasasa, qyzmetinen bosatylady.
