Eńbek ónimdiligi boıynsha Ońtústik Qazaqstan oblysy eń joǵary, Qyzylorda oblysy eń tómengi kórsetkishke ıe - Á. Isekeshev
Bul týraly búgin Májiliste «2010-2014 jyldarǵa arnalǵan Údemeli ındýstrııalyq-ınnovatsııalyq damý baǵdarlamasyn iske asyrý barysy» taqyrybynda ótken Úkimet saǵaty barysynda Indýstrııa jáne jańa tehnologııalar mınıstri Áset Isekeshev málim etti.
Mınıstrdiń aıtýynsha, 2010-2011 jyldary óńdeýshi ónerkásiptegi eńbek ónimdiligi elimizdiń barlyq óńirlerinde ósim kórsetkishine ıe boldy. Máselen, osy ósim kórsetkishi Astana qalasynda 2011 jyly 157,9 paıyzdy, Soltústik Qazaqstan oblysynda 149,6 paıyzdy jáne Jambyl oblysynda 146,7 paıyzdy qurady.
«Al esepti kezeńniń qorytyndysy boıynsha óńdeýshi ónerkásiptegi eńbek ónimdiligi deńgeıinde Ońtústik Qazaqstan oblysy kóshbasshy bolyp tabylady. Onyń kórsetkishi adam basyna 88,1 myń dollardy quraǵan. Al Qaraǵandy oblysyndaǵy kórsetkish 83,9 myń dollardy qurady. Eńbek ónimdiliginiń eń tómengi kórsetkishi Qyzylorda oblysyna tıesili, bul 13,6 myń dollarǵa teń. Sondaı-aq, Aqmola oblysynyń kórsetkishi 20,6 myń dollar, Qostanaı oblysynyń kórsetkishi 21,2 myń dollardy qurady», - deıdi mınıstr.
