Eńbek naryǵynda eń joǵary jáne eń tómen suranysqa ıe mamandyqtardyń reıtingisi jasaldy - Astana ákimdigi
ASTANA. 19 qańtar. QazAqparat /Jasulan Amanbaıuly/ - Eńbek naryǵynda eń joǵary jáne eń tómen suranysqa ıe mamandyqtardyń reıtingisi jasaldy.
Bul týraly búgin elorda ákimdiginde «Astanadaǵy jumyssyzdyq: sheshý joldary» atpen ótken dóńgelek ústel barysynda Astana qalalyq jumyspen qamtý jáne áleýmettik baǵdarlamalar basqarmasynyń bastyǵy Alma Altybaeva aıtty.
A. Altybaevanyń aıtýynsha, Astanadaǵy barlyq JOO-ǵa, kolledjder men lıtseılerge taldaý júrgizilgen. Sonyń negizinde JOO-lar, mamandyqtardyń dınamıkasy jáne kelesi jylǵa arnalǵan boljamdar týraly málimetter bazasy jasaqtaldy.
«Onyń negizinde eńbek naryǵynda joǵary suranysqa ıe mamandyqtardyń reıtingisi jasaldy. Tizim kóshiniń basynda baılanys, energııamen qamtamasyz etý, qurylys jáne qyzmet kórsetý salalaryndaǵy mamandyqtar tur», - deıdi A. Altybaeva.
Al eń tómengi kórsetkishke, basqarma tóraǵasynyń atap ótkenindeı, gýmanıtarlyq, ekonomıkalyq jáne zań mamandyqtary ıe kórinedi.
«Byltyr Astana qalalyq jumyspen qamtý ortalyǵyna 14 855 adam ótinish túsirdi. Onyń ishinde 9 600 adam jumysqa ornalastyryldy. Statıstıka boıynsha, qaladaǵy jumyssyzdardyń sany - 22 300 adam. Eger 2010 jyly elordadaǵy jumyssyzdyq deńgeıi 6,1 paıyzdy qurasa, 2011 jyly ol kórsetkish 5,8 paıyzǵa deıin tómendedi», - dedi A. Altybaeva elordadaǵy eńbek naryǵyna jasaǵan baıandamasynda.
Statıstıka boıynsha, ákimdik byltyr «Jumyspen qamtý-2020» baǵdarlamasy aıasynda 1,6 myń jumyssyzdy oqytýǵa jáne qaıta daıarlaýǵa jiberdi. Sondaı-aq, 300-den astam adamdy biliktilikterin joǵarylatý kýrstaryna baǵyttady.
