Eńbek naryǵyna joǵary demografııalyq qysym jumyssyzdyqtyń artýyna ákelýi yqtımal – Dáýlet Arǵyndyqov

ASTANA. QazAqparat – Memleket basshysy Joldaýynyń negizgi baǵyttarynyń biri ónerkásip saıasaty, agrarlyq sektor jáne azyq-túlik qaýipsizdigi boldy. Mundaı pikirdi «Eńbek resýrstaryn damytý ortalyǵy» AQ prezıdenti Dáýlet Arǵyndyqov bildirdi, dep habarlaıdy QazAqparat tilshisi.

«Memleket basshysy Joldaýynda birneshe baǵytty belgilep berdi. Olardyń ishinde ónerkásip saıasaty, agrarlyq sektor, azyq-túlik qaýipsizdigi – negizgi baǵyttardyń biri sanalady. Eńbek naryǵy turǵysynan alyp qaraǵanda óndiristi damytý nemese ındýstrııalandyrý sapaly jumysty damytýǵa barynsha oń áserin tıgizedi. Búginde eńbek naryǵynda belgili bir problema bar. Birinshi kezekte, ol jumys oryndary sapasynyń jetkiliksizdigine qatysty. Negizinde mundaı sapaly jumys oryndary dál sol óndiriste quryla alady», - dedi D.Arǵyndyqov QazAqparat tilshisine bergen suhbatynda.

Spıkerdiń túsindirýinshe, sapaly jumys orny degen joǵary tabysty, jalaqyny, qaýipsiz eńbek jaǵdaıyn, qartaıǵanda nemese naýqastanǵan jaǵdaıdaǵy táýekelderden qorǵanys júıesinde bolýdy bidiredi.

«Búgin Memleket basshysynyń Joldaýda jarııalaǵan tapsyrmasy boıynsha eńbek naryǵyn damytýdyń keshendi jospary ázirlenedi. Onyń maqsaty – básekege qabiletti, boljamdy ári beıimdelgish eńbek naryǵyn qurý. Al onyń mańyzdy basymdyǵy joǵaryda atap ótkenimdeı, jańa sapaly jumys oryndaryn qurý bolmaq. ıAǵnı, eńbek naryǵy tek jumyspen qamtýǵa ǵana emes, sapaly jumys ornyn qurýǵa baǵyttalýy qajet», - dedi Dáýlet Arǵyndyqov.

Onyń atap ótýinshe, eńbek naryǵyna keletin jastar sanynyń jyldan jylǵa artýy da syn-tegeýrinderdiń biri sanalady. Aldyn ala boljamǵa sáıkes, 2029 jyly elimizdiń eńbek naryǵyn 300 myńnan astam jas tolyqtyrady.

«Bul 2000 jáne odan keıin jyldardaǵy demografııalyq ósimmen baılanysty. Demek, osy jastar eńbek naryǵyna shyǵady jáne olarǵa jumys qajet bolady. Eńbek naryǵyna joǵary demografııalyq qysym jumyssyzdyqtyń, ásirese jastar arasynda artýyna alyp kelýi múmkin. Munyń ústine kenttený de jalǵasýda. Bizdiń boljamǵa sáıkes, 2029 jyly jumys kúshiniń ósimi halyqtyń ekonomıkalyq belsendi turǵynyna eseptegende 9,6 mln adam bolady. Bul 2022 jylmen salystyrǵanda 4 paıyzǵa jýyq ósim degen sóz. Qazaqstannyń eńbek naryǵynda jumys kúshin bólýde óńirlik teńsizdik kúsheıedi. Jumys kúshi kóp ońtústik óńir halqy basymdyqqa ıe bolyp, al soltústik jáne shyǵys óńirlerde jumys kúshi tapshylyqqa aınalady. Sondyqtan da ónerkásip saıasatyn damytý, aýyl sharýashylyǵyn ındýstrııalandyrý jumyspen qamtý jáne tabys turǵysynan alǵanda eńbek naryǵyna oń áserin tıgizedi», - dedi ol.