Eńbek naryǵynda qandaı mamandyqtar joıylýy múmkin — sarapshy pikiri
ASTANA. KAZINFORM — Eńbek naryǵynda turaqtylyq saqtalyp otyr. Bul týraly QR Eńbek jáne halyqty áleýmettik qorǵaý mınıstrligi Halyqty jumyspen qamtý departamentiniń dırektory Muhtar Tóleý Jibek Joly telearnasynyń «Búgin Live» baǵdarlamasynda málimdedi.
— Ulttyq statıstıka bıýrosynyń málimetinshe, bıyl jumyssyz retinde tirkelgender sany 448 myń adamdy quraıdy. Byltyrǵymen salystyrsaq, bıyl 0,1 kórsetkishke tómendegen. Jumyssyzdyq deńgeıi Halyqaralyq eńbek uıymynyń erejesi, statıstıka boıynsha esepteledi. Elimizdiń eńbek naryǵynda turaqtylyq saqtalyp otyr, — dedi spıker.
Sonymen qatar maman eńbek naryǵyndaǵy ahýal tek jalpy statıstıkamen shektelmeıtinin atap ótti. Onyń sózinshe, jumyssyzdyqtyń qalyptasýyna birqatar faktor áser etedi. Sonyń biri — bos jumys oryndary men jumys izdeýshiler sany shamalas bolǵanymen, olardyń suranysy men usynysy tolyq sáıkes kele bermeıdi.
Máselen, bıyl naýryz aıynda Enbek platformasynda 102,6 myń bos jumys orny jarııalansa, jumys izdeýshiler tarapynan joldanǵan túıindeme sany 107,1 myńǵa jetken. Kórsetkish eńbek naryǵynda kadr bar bolǵanymen, olardyń biliktiligi, ornalasqan jeri nemese tańdaǵan baǵyty usynylǵan jumys oryndarymen árdaıym qabysa bermeıtinin kórsetedi.
— Ekonomıka, tsıfrlandyrý, kadrlardy daıarlaýǵa qatysty máselelerdiń barlyǵy osyǵan áser etedi. Mıgratsııalyq dısproportsııanyń mańyzy zor. Úlken qalalarǵa kóshý úderisi de sonyń qatarynda, — dedi Muhtar Tóleý.
Osyǵan baılanysty elde belgili bir salalarda maman tapshylyǵy saqtalyp otyr. Ásirese óndiris, tsıfrlandyrý, qarjy jáne kreatıvti ekonomıka baǵyttarynda bilikti kadrlarǵa suranys joǵary. Mundaı jaǵdaıda azamattardy eńbekke tartý, jańa daǵdylarǵa beıimdeý jáne qaıta daıarlaý sharalarynyń mańyzy arta túsedi.
Bul rette memlekettik qoldaý tetikteri de júıeli túrde iske asyrylyp jatyr. Sonyń biri — azamattardy jumysqa baǵyttap, eńbek naryǵyna beıimdeıtin «Mansap» ortalyqtary.
— Ortalyqqa júgingen azamattarǵa baǵyt-baǵdar beriledi, mamandyq boıynsha jumys oryndary usynylady. Eger tabylmasa, jumyssyz retinde tirkeımiz. Jastarǵa «Jastar praktıkasy» baǵdarlamasy bar. Zeınetkerlerge «Kúmis jas» degen joba qarastyrylǵan. Tegin daıarlaý kýrstary da bar. Ol suranysqa saı mamandyqtardy oqytady. Ári qaraı azamattyń jumyspen qamtylýyna jaǵdaı jasalady, — dedi ol.
Maman azamattardy ınternet keńistiginde taralatyn kúmándi deldaldardyń qyzmetine aldanyp qalmaýǵa shaqyrdy. Onyń aıtýynsha, jumysqa ornalastyrýǵa qatysty memlekettik qyzmetterdiń barlyǵy tegin usynylady.
— Memleket tarapynan barlyǵy tegin. Osyny eskerip, ortalyqqa barý qajet. Bul mekemelerdiń maqsaty da halyqty eńbekke yntalandyrý, — deıdi ol.
Spıker aldaǵy ýaqytta eńbek naryǵyna tehnologııalyq ózgerister áser etýi múmkin ekenin aıtty. Osyǵan oraı eńbek naryǵy jańa talaptarǵa beıimdelip, mamandardan tyń daǵdylardy talap etedi.
— Joıylý qaýpinde mátin terýshiler, operatorlar tur, — dedi spıker.
Eske salaıyq, jaqynda Premer-mınıstr Oljas Bektenov Batys Qazaqstan, Atyraý, Aqtóbe, Qaraǵandy oblystarynda erekshe muqtajdyǵy bar balalar ózine tıesili orta bilimdi durys ala almaı otyrǵanyn synady.
