Eńbek naryǵyna JI qanshalyqty áser etip jatyr
ASTANA. KAZINFORM — Eńbek jáne halyqty áleýmettik qorǵaý mınıstrligi aldaǵy ýaqytta jasandy ıntellekt elimizde qaı mamandyqtarǵa erekshe áser etetini jaıynda túsinik berdi.
— Mınıstrlik aldaǵy jyldary jumys oryndaryn avtomattandyrý, robottandyrý nemese generatıvti jasandy ıntellektini (JI) paıdalaný esebinen almastyrý áleýetine taldaý jasaǵan bolatyn. Zertteý nátıjesinde jalpy alǵanda qyzmetkerlerdiń fýnktsııalarynyń 29 paıyzy avtomattandyrylýy, al 13 paıyzy JI kómegimen oryndalýy múmkin ekeni anyqtaldy. Salalyq turǵydan alǵanda, qyzmetkerlerdi JI-men almastyrý áleýeti eń aldymen kásibı, ǵylymı jáne tehnıkalyq qyzmet kórsetý salasynda, sondaı-aq densaýlyq saqtaý salasynda baıqalady. Alaıda, jańa tehnologııalar áli kúnge deıin eńbek naryǵyn tolyqtaı joıǵan joq. Buǵan deıin de jańa tehnologııalar (kompıýterler, arnaıy óndiristik mashınalar) paıda bolǵan kezeńderde jumyssyz qalý qaýpine qatysty adamdar alańdaǵan eli. Degenmen, kerisinshe, jańa tehnologııalar eńbek naryǵynda jańa salalar men mamandyqtardyń qalyptasýyna yqpal etti, — delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, osy oraıda tehnologııalyq jańalyqtar azamattardyń jumys oryndaryn emes, negizinen kúndelikti qaıtalanatyn jumystardy ǵana almastyrady.
— Bul turǵyda avtomattandyrý men jasandy ıntellekt salasyndaǵy biliktilik deńgeıin arttyrý, onyń ishinde jumys kúshiniń quzyretin úzdiksiz damytý jónindegi strategııalyq mindet endi eńbek naryǵyna shyǵatyn jastardy da, jumys istep turǵan jumys kúshin de qamtýǵa tıis.
Sebebi, álemdik tájirıbege súıensek, damyǵan memleketterde (Germanııa, Ońtústik Koreıa, Japonııa) jumys kúshin tıimdi paıdalanýdyń negizgi quraly – úzdiksiz bilim berý jáne qaıta daıarlaý júıesin damytý. Bul elderde jumys oryndaryna mamandardy tartý tek kolledj, ýnıversıtet túlekterin daıarlaýmen shektelmeı, ómir boıy oqý qaǵıdasyna negizdelgen.
Jumys protsesterin avtomattandyrýǵa baılanysty jańa quzyretterge degen qajettilik turaqty óz betinshe bilim alý jáne biliktilikti arttyrý úshin jaǵdaı jasaýmen, onyń ishinde jumys berýshilerdiń qoldaýymen óteledi, — dep atalyp ótken Eńbek mınıstrliginiń málimetinde.
Atap aıtqanda, 2025 jyldyń 1 qazanynda ótken «Jasandy ıntellektini damytý jónindegi keńes otyrysynda» Memleket basshysy eńbek naryǵyndaǵy ózgeristerdi aldyn ala boljaý jáne JI múmkindikterin paıdalanyp jańa jumys oryndaryn ashý qajettigin, onyń ishinde JI negizindegi qaıta daıarlaý platformasyn iske qosýdy tapsyrǵan bolatyn. Sondaı-aq, aldaǵy ýaqytta Qazaqstanda jasandy ıntellekt jónindegi mamandandyrylǵan zertteý ýnıversıtetin qurý josparlanǵanyn da atap ótti.
Odan bólek, Jasandy ıntellektti damytýdyń 2024 — 2029 jyldarǵa arnalǵan tujyrymdamasynda aldaǵy 5 jylda 25 myńǵa deıin maman daıarlaý jáne jyl saıyn 1000-ǵa jýyq oqýshyny oqytý jáne 1000 jasandy ıntellekt mamanyn daıarlaý josparlanǵan.
Mınıstrlik tarapynan atalǵan salany damytýda búginde kóptegen is-sharala qamtylǵan. Atap aıtatyn bolsaq, óz biliktilikterin arttyra alatyn «Skills.Enbek» onlaın-oqytý platformasy iske qosylǵan.