Eńbek naryǵyn qoldaý: 200 myńnan asa qazaqstandyq jumysqa ornalastyryldy
ASTANA. KAZINFORM — Jyl basynan beri 131 myńnan astam adam jumyspen qamtýǵa járdemdesýdiń belsendi sharalarymen qamtyldy, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
2026 jylǵy 1 maýsymdaǵy jaǵdaı boıynsha jumyspen qamtýǵa járdemdesýdiń belsendi sharalarymen 131,3 myń adam qamtylyp, 200,4 myń qazaqstandyq jumysqa ornalastyryldy.
Halyqty jumyspen qamtýdy arttyrý, kásipkerlikti damytý jáne azamattardy kásibı oqytý boıynsha qabyldanyp jatqan keshendi sharalar Úkimettiń erekshe baqylaýynda. Bul mindetterdi iske asyrýdyń negizgi tetikteri retinde óńirlik jumyspen qamtý kartalary, ulttyq jobalar jáne salalyq memlekettik baǵdarlamalar júzege asyrylyp jatyr.
— Jumyspen qamtý saıasatynyń mańyzdy baǵyttarynyń biri — sýbsıdııalanatyn jumys oryndaryn uıymdastyrý. Búginde mundaı jumys oryndaryna 69,8 myń adam ornalasqan. Onyń ishinde: qoǵamdyq jumystarǵa — 49,6 myń adam, áleýmettik jumys oryndaryna — 8,2 myń adam, jastar praktıkasyna — 4,9 myń jas maman, al «Kúmis jas» jobasy aıasynda — 7,1 myń adam, — delingen habarlamada.
Eńbek naryǵynda suranysqa ıe jańa daǵdylardy meńgerý men azamattardyń biliktiligin arttyrý máselesine de erekshe nazar aýdarylyp otyr. Onlaın oqýmen 37,5 myń jumyssyz azamat qamtylyp, olardyń 29,3 myńy oqý kýrstaryn aıaqtap, tıisti sertıfıkattarǵa ıe boldy.
Sonymen qatar halyqtyń kásipkerlik áleýetin arttyrýǵa baǵyttalǵan «Bastaý Bıznes» jobasy da jalǵasyp keledi. Jyl basynan beri kásipkerlik negizderine 21 myń adam oqytylyp, onyń ishinde 10 myń adam oqýyn aıaqtap, sertıfıkat aldy.
Jumys berýshilerdiń suranysy negizinde kásibı oqytýǵa 3 040 adam jiberildi. Onyń 78-i oqýyn aıaqtap, 46 adam turaqty jumysqa ornalastyryldy. Bul shara óńirlik eńbek naryqtarynyń qajettilikterine saı mamandar daıarlaýǵa múmkindik beredi.
Sonymen birge mansap ortalyqtarynda azamattarǵa kásiptik baǵdar berý jumystary belsendi júrgiziledi. Áleýmettik kásiptik baǵdarlaý jáne konsýltatsııalyq qyzmettermen 170,6 myń adam qamtyldy. Bul azamattardyń mamandyq tańdaýda durys sheshim qabyldaýyna jáne eńbek naryǵyndaǵy básekege qabilettiligin arttyrýǵa yqpal etedi.
Azamattardy jumysqa ornalastyrý birneshe baǵyt boıynsha júzege asyrylatyny jáne mindetti zeınetaqy jarnalarynyń aýdarylýy arqyly rastalatynyn aıta ketý kerek.
2026 jylǵy 1 maýsymdaǵy jaǵdaı boıynsha barlyǵy 200,4 myń adam jumysqa ornalastyryldy:
— halyqty jumyspen qamtýǵa járdemdesýdiń belsendi sharalary aıasynda — 69,8 myń adam;
— Elektrondyq eńbek bırjasynda jumys berýshiler usynǵan bos jumys oryndaryna — 69,9 myń adam;
— Memleket basshysynyń «10 myń turǵynǵa 100 jumys orny» bastamasy aıasynda — 55,7 myń adam;
— ortalyq memlekettik organdar iske asyryp jatqan jobalar sheńberinde — 5 myń adam.
Sonymen qatar halyqtyń kásipkerlik belsendiligin qoldaý maqsatynda 2026 jyly áleýmettik osal sanattaǵy azamattarǵa jańa bıznes-ıdeıalardy iske asyrý úshin 400 AEK-ke deıingi mólsherde, ıaǵnı 1 730 000 teńge kóleminde 9 myń memlekettik grant berý kózdelgen.
Jumyspen qamtýǵa járdemdesý sharalary elimizdiń barlyq óńirinde jalǵasady. Bul jumystar halyqtyń turaqty jumyspen qamtylýyn qamtamasyz etýge, azamattardyń tabysyn arttyrýǵa jáne adamı kapıtaldy damytýǵa baǵyttalǵan.
Osyǵan deıin Qazaqstanda 2026 jylǵy I toqsanda jumyssyzdyq deńgeıi 4,5% bolǵanyn jazǵan edik.
